Qyz balalardyń qulaǵyndaǵy altyn syrǵalaryn aldap alyp ketken boıjetken ustaldy
ALMATY. QazAqparat - Almatyda qyz balalardyń syrǵasyn urlaýmen aınalysyp kelgen qyz ustaldy, dep habarlaıdy QazAqparat tilshisi.
19 jastaǵy boıjetken qazir ýaqytsha qamaý ornynda otyr.
«Azamatsha oıyn alańyndaǵy balalardyń arasynan qyz balalardy taýyp alyp aldaıdy eken. Olarmen sóılesip, qulaqtaryndaǵy syrǵasyn, alqasyn sheshkizip alyp taıyp otyratyn bolǵan. Osylaısha kúdikti 4 balany aldap soqqan», - dedi Áýezov aýdandyq ІІB basshysynyń orynbasary Qumarbek Kenshinbaev.
Onyń aıtýynsha, kúdikti Alataý aýdanynda osyǵan uqsas alaıaqtyq áreketi úshin buryn da qylmystyq jaýapkershilikke tartyldy.
«Kóp jaǵdaıda balalar qylmyskerdiń túrin dóp basyp sýrettep bere almaıdy. Sondaı-aq ata-anasynan qorqyp, altyndaryn bir jerde joǵaltyp aldym dep aıta salady. Sondyqtan, onyń áreketinen japa shekkender budan da kóp bolýy múmkin. Ondaı adamdar bolsa 298-53-01, 298-53-02 telefondaryna habarlassyn», - dedi ol.
