Qyz alyp qashqandar 7 jylǵa bas bostandyǵyn shekteý jazasyna kesildi
TALDYQORǴAN.QazAqparat - Almaty oblysynda dostaryna qalyńdyq alyp qashamyz dep bastary daýǵa qalǵan tórt aýyldasqa qatysty sot sheshimi shyǵyp, olardyń uzaq merzimge bas bostandyǵy shekteldi, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, oqıǵa 2019 jyldyń mamyr aıynda bolǵan. Sarqan aýdanynyń 22 jastaǵy turǵyny úılený maqsatynda óziniń eski tanysyn alyp qashýdy josparlaǵan. Alyp qashý operatsııasyna aýyldas dostaryn shaqyrǵan. Barlyǵy qalyńdyqtyń kelisimimen iske asatynyna senimdi dostary oǵan qarsy bomaaǵan.
Degenmen, Sarqan qalasynan qalyńdyqty alyp qashý barysynda qyz ben úılenýshi jigittiń arasynda eshqandaı sóz baılasýdyń joq ekeni belgili bolady. Shańyraq kóterýge asyqqan dostary qalyńdyǵyn jetkizip berip, ózderi úılerine ketedi. Erkinen tys ákelgen qalyńdyqty jergilikti ýchaskelik polıtsııa ınspektory qutqaryp, úıine aman-esen jetkizgen.
«Sarqan aýdanynyń polıtsııasyna erkinen tys adam urlaý deregi boıynsha habar tústi. Aıtqan ýájderin tyńdamaǵan jigitterdiń jibermeıtinin túsingen qalyńdyq amalyn taýyp, ishki ister organdaryna habar beredi. Zardap shegýshi tarapynan polıtsııaǵa aryz tústi. Derek boıynsha QR Qylmystyq kodekstiń 125-babyna sáıkes is qozǵalyp, qylmystyń mán-jaıy anyqtaldy»,- dep habarlady oblystyq PD baspasóz qyzmeti.
Jaqynda Sarqan aýdanynyń soty «súıiktisin» alyp qashqan áreketi sátsiz shyqqan 22 jastaǵy turǵyn men onyń zańsyz áreketine qoldaý bergen úsh dosy qylmys jasaǵandyǵy úshin kináli dep tanylyp, jeti jyl bas bostandyǵyn shekteý jazasyna kesildi.
Sot sheshimi zańdy kúshine endi.
