Qytaıtanýshy jýrnalıst D. Omarovtyń jańa kitaby jaryq kórdi
Bul - únemi bir ǵana taqyrypqa, qytaıtaný máselelerine tereń boılap júrgen jas qalamgerdiń úshinshi kitaby. Qytaı eliniń bylaıǵy jurt bile bermeıtin úlgi-úrdisi, qasıet-qaǵıdasy, salt-sanasy, dástúr-daǵdysy elep-ekshelip, jınaqtaǵy maqalalarǵa ózek bolǵan. Alyp memlekettegi qazaq dıasporasynyń jaı-kúıi, tanymal qandastardyń tynys-tirshiligi jóninde jan-jaqty baıandalǵan. On jyldan beri osy eldi mekendep kele jatqan avtor óz tanymyndaǵy Qytaıdyń áleýmettik beınesin oqyrmanǵa keńirek tanytady. Týǵan topyraǵy men júrgen jeriniń jetistikterin salmaqtap salystyrady, sabaqtastyryp saralaıdy.
Dáýren Omarov jıyrma jeti jasta. Shanhaı qalasyndaǵy Shyǵys Qytaı Ǵylym jáne tehnologııalar ýnıversıtetiniń bakalavrıaty men magıstratýrasyn bitirgen. Budan buryn «Erte turatyn el» (2008) jáne «Merekesi mol memleket» (2010) atty tanymdyq kitaptary jaryq kórgen. «Shabyt» halyqaralyq jastar festıvaliniń Gran prı júldesiniń ıegeri, «Daryn» memlekettik jastar syılyǵynyń laýreaty. Jınaqqa engen maqalalardyń bári «Egemen Qazaqstan» jáne «Aıqyn» gazetterinde jarııalanǵan. Ol negizgi qyzmetimen birge osy basylymdardyń sol memlekettegi tilshisi mindetin qosa atqarady.
Oqyrman bul kitaptan Qytaı eliniń qazirgi turmys-tirshiligi, onda turatyn qandastarymyzdyń ahýaly, baǵyt-baǵdary, kórshi jurttyń Qazaqstanmen qarym-qatynasy jóninde jan-jaqty málimet alady.
