Qytaıtanýshy Klara Hafızovanyń dala bıleýshileri men olardyń dıplomatııasy týraly kitaby shyqty
Sharaǵa shyǵystanýshylar, saıasattanýshylar, QR UǴA akademıkteri, belgili qoǵam jáne saıası qaıratkerler, dıplomattar men BAQ ókilderi qatysty.
QR Prezıdenti janyndaǵy Qazaqstan strategııalyq zertteýler ınstıtýtynyń dırektory Erkin Tuqymovtyń sózinshe, monografııa eki ǵasyr boıy qazaq memlekettiligin, aýmaqtyq tutastyǵy men ulttyq birligin saqtap qalý jolyndaǵy Qazaq handyǵy bıleýshileriniń úsh urpaǵynyń qyzmetine arnalǵan.
«Klara Shaısultanqyzy asa qıyn baǵyt – qytaıtaný salasynda eńbek etip júrgen naǵyz ǵalymnyń qaısarlyǵynyń úlgisi. Janqııarlyq qyzmeti jas zertteýshi-ǵalymdardy táýelsiz Qazaqstannyń shyǵystaný jáne qytaıtaný ǵylymdarynyń damýyna úles qosýǵa shabyttandyrady. Qazaqstanda qytaıtaný mektebi áli qalyptasý satysynda, sondyqtan Klara Shaısultanqyzynyń eńbegi sekildi árbir monýmentaldy týyndynyń quny altynmen baǵalanady. Qytaıtaný – qajetti bilim kólemi, quzyrettilik deńgeıi, qytaı tilin bilýi jáne t.b. eskeriletin kúrdeli baǵyt. Sondyqtan, búgingi tańda QSZI qytaıtaný boıynsha zertteýlerdiń bastamashysy bolyp, osy baǵyttyń damýyna yqpal etýi mańyzdy. Sebebi, erte me, kesh pe júıeli mekteptiń qalyptasary daýsyz», - dedi ınstıtýt dırektory.
Avtordyń aıtýynsha, kitapta qazaq bıleýshileriniń úsh urpaǵynyń ómirbaıany arqyly olardyń eki ǵasyrǵa jalǵasqan dıplomatııalyq kelbeti sıpattalady. Halyqaralyq qatynastardyń kúrdeli kezeńinde qazaq memlekettiligin, aýmaqtyq tutastyǵy men ulttyq birligin saqtaýdaǵy úzdiksiz kúresi dáleldi baıandalady. Handyqtyń azat kezeńi men Reseı ımperııasy joıyp jibergennen keıingi taǵdyry da qamtylǵan.
«Bul eńbekte negizinen Ábilmámbet, Abylaı han, Ábilfeıiz sultan jáne onyń urpaqtary: Orys, Altynsary, Joshy, Sart ıÝchın, Kenesary, Ǵubaıdolla, Álı sultandar, Abylaı hannyń uly Sók sultan, Tezek, Shoqan Ýálıhanov, jońǵar hany Dabashy (Davatsı), Tóle bı men Qabanbaı, Qojabergen, Berdiqoja batyrlar jáne taǵy basqalary týraly jazyldy. Mysaly, oqyrmandar kitapta úzindileri berilgen keıbir qujattardyń tolyq aýdarmasyn «Tsın ımperııasy men Qazaq handyǵynyń qarym-qatynasy», «Shyǵys Túrkistan men Orta Azııa tarıhy boıynsha materıaldar men Qytaı qujattary», «Órkenıetter toǵysyndaǵy Shyǵys dıplomatııasy» jınaqtarynan taba alady», - deıdi Klara Hafızova.
Aıta keteıik, kitapty QR Prezıdenti janyndaǵy Qazaqstannyń strategııalyq zertteýler ınstıtýty basyp shyǵardy. Elimizdegi kitaphana men oqý oryndaryna tegin taratylady. Sonymen qatar, elektrondy nusqasy da bar.
