Qytaımen shekaradaǵy ótkizý beketterinde sanıtarlyq-epıdemıologııalyq baqylaý kúsheıtildi
Bul sharalar Qytaıdyń Ýhan qalasyndaǵy koronavırýstyń órshýine baılanysty qolǵa alyndy. Vırýs taralýynyń aldyn alý úshin mınıstrlik Qytaıǵa sapardan ýaqytsha bas tartýǵa keńes beredi.
«Altynkól temirjoly», «Nur joly», «Qorǵas» HShYO baqylaý-ótkizý beketterinde jáne Úrimji - Almaty poıyzdarynda aýrýdyń aldyn alý sharalary júrgizilýde.
Eske sala keteıik, «Qorǵas» HShYO 2020 jyldyń 2 aqpanyna deıin jabyq tur. Ótkizý beketteriniń Qytaıdyń jańa jyl merekesin toılaýǵa baılanysty jabylǵan bolatyn.
Sonymen birge barlyq áýejaılar men temirjol vokzaldarynda, avtomobıl ótkelderinde, ásirese QHR-dan kelgen adamdarǵa (jolaýshylarǵa, tasymaldaýshylarǵa, ekıpaj múshelerine, bortserikterge jáne basqalarǵa) mindetti termometrııalyq tekserý júrgiziledi.
Qazirgi ýaqytta memlekettik shekaranyń ótkizý beketterinde QHR-dan kelgen 19 704 adam tekserýden ótti: Almaty jáne Nur-Sultan halyqaralyq áýejaılarynda 17 043 adam, temirjol vokzalynda – 161 adam tekserildi. Olardyń arasynda dene qyzýy kóterilgen jáne syrqat belgileri bar jolaýshylar bolmady.
Aıta keteıik, medıtsınalyq uıymdarda qajetti dári-dármekter men medıtsınalyq maqsattaǵy buıymdardyń tizimi jasaldy. Jergilikti densaýlyq saqtaý organdary juqpaly aýrýlar statsıonarynyń patsıentterdi qabyldaýǵa daıyndyǵyn jáne basqa aýrýhanalarǵa qosymsha tósek oryndarymen qamtamasyz etti. Sonymen birge, medıtsınalyq qyzmetkerlerdiń teorııalyq jáne praktıkalyq daıyndyǵy pysyqtaldy.
Áleýmettik medıtsınalyq saqtandyrý qory negizinde 1406 jáne + 7 (7172) 76-80-43 Call-ortalyǵy ashyldy. Onda turǵyndar táýlik boıy qońyraý shalyp, álemdegi koronavırýstyq aýrý jaǵdaıy týraly qajetti aqparat pen aldyn alý sharalary týraly bile alady.
QR Densaýlyq saqtaý mınıstrligi atalǵan jaǵdaıdy turaqty baqylaýyna aldy.
Eske salaıyq, keshe QR Prezıdenti Qasym-Jomart Toqaev Qytaıdan Qazaqstan aýmaǵyna koronavırýstyń taralýyna jol bermeý boıynsha naqty uıymdastyrý sharalaryn qabyldaýdy tapsyrǵan bolatyn.
Qazir Qytaıda pnevmonııalyq ınfektsııanyń jańa túri tarap jatyr. Syrqatqa shaldyqqan jáne kóz jumǵandar sany kún sanap artyp keledi. Alǵashqy naýqastar tirkelgen kúnderi (15 qańtar) esepke 41 adam alynǵan bolatyn.
Sońǵy málimetter boıynsha koronavırýs aýrýymen aýyrǵandar sany 2,7 myń adamnan asty, 80 adam ólimi tirkelgen. Jańa koronavırýstyq ınfektsııamen aýyratyn adamdardyń kópshiligi Hýbeı provıntsııasynda (1 423, 76-sy qaıtys bolǵan). Qazaqstanmen shekaralas QHR Shyńjań-Uıǵyr avtonomııalyq aýdanynda (ShUAR) 5 adamnyń aýrýdy juqtyrǵany anyqtaldy.
Qazaqstan koronavırýsty zerthanalyq jaǵdaıda anyqtaýǵa múmkindik beretin praımerlerdi satyp alýdy bastady.
QR Densaýlyq saqtaý mınıstrligi elimizde ınfektsııa tirkelmegenin resmı málim etti.
QR Syrtqy ister mınıstrliginiń aqparatynsha, karantınge jabylǵan Qytaıdyń Ýhan qalasynda búginde Qazaqstannan 230 stýdent oqıdy. Olardyń 98-i ǵana qalada qalyp otyr. Qalǵandary demalystyń bastalýyna baılanysty Qazaqstanǵa jáne basqa da elderge ketip qalǵan.
Elimiz óńirlerindegi barlyq áýejaılarda profılaktıkalyq sharalar jáne oqý-jattyǵý jumystary júrgizilýde.