Qytaımen shekaradaǵy «Dostyq» stantsııasynda elektrondy kezek júıesi iske qosylady

ASTANA. QazAqparat – 23 qarashadan bastap Qazaqstan-Qytaı shekarasyndaǵy «Dostyq» ótkizý pýnktinde («Alashankoý» shektes ótkizý pýnkti) elektrondy kezektiń avtomattandyrylǵan júıesi pılotty joba retinde iske qosylady. Bul týraly QazAqparat Memlekettik kirister komıtetiniń baspasóz qyzmetine silteme jasap habarlaıdy.

Elektrondy kezek júıesin iske qosý maqsatynda QR Qarjy mınıstrliginiń Memlekettik kirister komıteti men QR UQK Shekara qyzmeti birlesip, Qazaqstannan «Dostyq» pýnkti arqyly shyǵatyn kólik quraldaryn ótkizýdi uıymdastyrýdyń ýaqytsha shemasyn bekitti.

23 qarashadan bastap Qoldau.kz nemese «CargoRuqsat» mobıldi qosymshasy (IOS nemese Android) platformasynyń avtomattandyrylǵan elektrondy kezek júıesi qoldanylady.

Qoldanystaǵy jýrnalǵa tirkeý jáne «Dostyq» ótkizý pýnktinde qaǵaz ruqsattamalardy berý 22 qarashadan bastap toqtatylady. Qaǵaz tasyǵyshtaǵy kezektiń qoldanystaǵy tizimi tsıfrlandyrylyp, aqparattyq júıege engiziledi.

Elektrondy kezek júıesin qurýdyń maqsaty – kólik quraldarynyń, júkter men taýarlardyń ótkizý pýnktine kirý kezektiligin qalyptastyrý protsesiniń ashyqtyǵy men tsıfrlandyrylýyn qamtamasyz etý, sondaı-aq eldiń tranzıttik-kóliktik jáne eksporttyq áleýetin arttyrý.

Júıeni QR QM «Aqparattyq-esepke alý ortalyǵy» AQ mamandary ázirledi. Bul júıe barynsha yńǵaıly jáne ashyq bolyp tabylady, júrgizýshi kórsetilgen portalda tirkelgennen keıin nemese mobıldi qosymsha arqyly jol júrý úshin bos kún men ýaqytty tańdaıdy. Bul rette júrgizýshi óz kezegi týraly SMS-habarlama alady.

Esterińizge sala keteıik, shekarada elektrondy kezek júıesin iske qosýdy Memleket Basshysy Qasym-Jomart Toqaev 20 qazanda Jetisý oblysynyń jurtshylyǵymen kezdesý barysynda tapsyrǵan bolatyn.

«Taǵy bir ózekti másele – karantındik shekteýlerge baılanysty Qazaqstan-Qytaı shekarasyndaǵy ótkizý pýnktteriniń jumysynyń kúrt baıaýlaýy. Júrgizýshilerdiń ádil narazylyǵyn týdyratyn júk kólikteriniń toptalýy bar. Jaǵdaıdy túzetý úshin «Alakól» jáne «Nur joly» shekaralyq ótkizý pýnkterinde elektrondy kezekti engizýdi jedeldetý qajet», - dep tapsyrdy Memleket basshysy.

Ýaqytsha shemamen QR QM Memlekettik kirister komıtetiniń resmı ınternet-resýrstarynda (kgd.gov.kz) jáne veb-saıtta CargoRuqsat.kz (CGR.qoldau.kz) tanysýǵa bolady.