Qytaımen saýda-sattyq tolyqqandy ári sapaly kedendik rásimdelýi tıis – QR Premer-Mınıstri
«Biz syrtqy jáne ózara saýda-sattyq statıstıkalaryn teńestirý ári syrtqy saýda aǵyndarynyń ashyqtyǵy qajet ekendigi jaıynda jıi aıtamyz. Sur ımport ishki óndirýshilerge, zańdy ımporttaýshylarǵa aıtarlyqtaı zııanyn tıgizedi, memleketterimizdiń bıýdjetine teris áser etedi. Qazirgi ýaqytta Qazaqstan Qytaımen shekaradaǵy kedendik baqylaý is-sharalaryn aıtarlyqtaı kúsheıtti. Eki aıǵa tolmaıtyn ýaqyttyń ishinde qabyldanǵan is-sharalar taýarlardyń rásimdelýiniń jáne kedendik tólemderdiń artýyna alyp keldi. Degenmen, Qytaıdan ımporttyń kórshi elderge aıtarlyqtaı óskenin baıqap otyrmyz», - dedi Álıhan Smaıylov.
Úkimet basshysynyń atap ótýinshe, odan keıin atalǵan ımport laıyqty kedendik tazartýsyz jáne salyq tólemderin tólemesten EAEO-nyń ortaq naryǵyna túsedi.
«Bul rette «jalǵyz kisi jaý almas» degen maqal oryn alǵan jaǵdaıdy sıpattaýǵa dál keledi. Syrtqy saýda-sattyqty, birinshi kezekte Qytaımen saýdany tolyqqandy ári sapaly kedendik rásimdeýge birlese kúsh salýymyz qajet. Barlyq protsesterdi jáne málimetter almasýdy dereý tsıfrlandyrý kerek. Bul adal básekelestikti damytý jáne salyqtar men kedendik baj salyǵy esebinen bıýdjetke túsimderdi arttyrý úshin serpin beredi. Mundaı jumysty komıssııanyń belsendi úılestirýimen júrgizý qajet. Kelissózder alańyn qurǵannan is bitpeıdi. Naqty qadamdar qabyldaıtyn jáne kóptegen saǵatqa sozylatyn jınalystardan bas tartatyn ýaqyt keldi», - dedi Qazaqstan Premer-Mınıstri.
