Qytaılyqty qaǵyp ketken qazaqstandyqqa qatysty sot otyrysy bastaldy
ASTANA. 22 tamyz. QazAqparat /Arman Asqarov/ - Aǵymdaǵy jyly maýsymnyń 6-sy kúni Qytaıda motojúrgizýshini qaǵyp ketken «Pavlodar-Úrimshi» avtobýsynyń jýrgizýshisi Vladımır Shýstqa qatysty sot otyrysy bastaldy.
Bul týraly búgin QR Syrtqy ister mınıstrliginiń resmı ókili Asqar Abdrahmanov málim etti.
Pavlodarlyq azamat V.Shýstqa qatysty tergeý amaldary endi ǵana aıaqtalyp, sotqa berilgen kórinedi. Qaıǵyly oqıǵa oryn alǵan kezde avtobýsta bolǵan jolaýshylar bárine kýá boldy. Olardyń aıtýynsha, mototsıkl mingen qytaılyq azamat jol júrý erejelerin buzyp, joldyń qarsy jaǵyna shyǵyp ketken. Oǵan qosa, ol mas boldy. Sol kúni qytaılyqtar Kúrish meıramyn toılap jatqanǵa uqsaıdy. Al beıresmı derekke sáıkes, sońǵy kezderi Qytaıdaǵy keıbir azamattar ádeıi kóliktiń astyna túsip, osymen nápaqa tabýdy ádetke aınaldyrǵan.
QR Syrtqy ister mınıstrliginiń resmı ókili Asqar Abdrahmanovtyń sózine qaraǵanda, V.Shýst qaıtys bolǵan qytaılyq azamattyń týǵan týystaryna moraldyq shyǵyn tólep, elge oralýy múmkin. «Biraq onyń kúnási tolyǵymen dáleldenetin bolsa, V.Shýstty qamaýǵa alady», - deıdi ol.
