Qytaılyqtar Sábıttiń erligine de, terezeniń sapasyna da tánti boldy

NUR-SULTAN. QazAqparat – Astanada 8-i qabattaǵy terezeden úsh jastaǵy sábıdi qutqaryp qalǵan Sábıt Shontaqbaevtyń erligine sheteldikter de tánti bolyp jatyr. Solardyń ishinde qytaılyqtar da qazaq jigitiniń erlikke para-par isine maqtaýyn jaýdyrýda.

Aıta ketsek, kúni keshe ǵana 8-qabattaǵy terezeden salbyrap turǵan 3 jasar qyzdy qutqarǵan Sábıt Shontaqbaevtyń oqıǵasyn sheteldik aqparat quraldary da jazdy.

QazAqparat agenttiginiń osy oqıǵa týraly jańalyǵy búkil álemge, sonyń ishinde Qytaıǵa da keńinen tarap ketken edi.

Qytaıtildi qoldanýshylardyń kóbi Twitter-de bul oqıǵaǵa pikir bildirip, Sábıttiń áreketin qoldap, emotsııalaryn da qaldyrypty.

Olardyń biri bylaı dep jazdy: «Tirek núktesi joq jerde ózi áreń ilinip turyp ol balany óz denesimen ustap aldy. Bul shynynda tańqalarlyq jaǵdaı. Sonymen qatar, oǵan terezeden úıge oralý ońaı bolǵan joq. Bul qutqarý oqıǵasy shynymen de qatty áser etti. Myqty, sapaly terezeler de kómektesedi eken».

Taǵy biri batyrdy maqtap, uzaq ǵumyr tilep: «Bul keremet qutqarý oqıǵasy. Jaqsy adamdar uzaq ómir súredi» degen pikir qaldyrdy. «Óte ǵajaıyp sát eken, eger men sol jerde bolsam, qyzdy qutqarmaq túgili osyǵan qarap turýǵa da batylym jetpes edi...» dep te jazypty.

Eń qyzyǵy, kóptegen qytaılyq jeli qoldanýshylary Sábıttiń erlik isterin maqtaı otyryp, Qazaqstandaǵy ǵımarattardyń terezeleriniń sapasyn da áńgime etip jatyr. Keıbireýleri terezeni shyǵarǵan zaýytty da maqtaý kerektigin aıtypty.

Osy ýaqyttarda QazAqparat agenttiginiń qytaı tilindegi Twitter jelisinde Sábıttiń balany qutqaryp jatqany túsirilgen vıdeo 67 myń ret qaralyp, 500-den astam adam ony bólisken. 2 myńnan astam laık basylyp, 90-ǵa jýyq adam pikir qaldyrǵan.