Qytaılyqtar ǵalamtorǵa beınerolıkterdi jeke kýáligin kórsetýmen ǵana sala alady
BEIJІŃ. 21 qańtar. QazAqparat - Qytaıdaǵy ǵalamtordy paıdalanýshylar eldiń beınematerıaldar servısterinde naqty aty-jónderi boıynsha tirkelýge mindetti, dep habarlaıdy ITAR-TASS.
Radıo habarlaryn taratý, kınematografııa jáne televıdenıe isteri jónindegi memlekettik basqarmanyń baıandamasynda shekteýler tek Qytaıda tirkelgen saıttarǵa ǵana qatysty delingen. Eldegi ǵalamtor resýrsyna beınerolık qosý úshin paıdalanýshy saıt ákimshisine jeke kýáliginiń kóshirmesin usynýy tıis. «Aspan asty eliniń» bılik ókilderi mundaı shekteý qoıylýdy «ǵalamtorda qatygezdik pen zorlyq-zombylyqty nasıhattaıtyn, qoǵam úshin qaýip týdyratyn aqparattyń taralýyna jol bermeý úshin engizilip otyr», - dep túsindiredi. - Internet órkenıetti ári parasatty qarym-qatynas ortasy bolýy tıis. Ol úshin ınternet-saıttardy ospadar beınerolıktermen toltyrýǵa kedergi bolatyn mehanızm asa qajet». Qytaıda Internet jelisine beınematerıaldardy salý men ony saqtaý qyzmeti asa tanymal. Qytaılyq sarapshylardyń pikirinshe, ony 428 mıllıonǵa jýyq adam paıdalanady. Oǵan qytaı úkimetiniń álemdegi iri YouTube beıneservısine kirýge tosqaýyl qoıýy sebep bolyp otyr.
