Qytaılyq stýdentter qazaq tilinen dıktant jazyp, mánerlep oqýdan jarysty

BEIJІŃ-SIANЬ. QazAqparat - Qytaıdyń Sıan shet tilderi ýnıversıtetinde (SShTÝ) qazaq tilin nasıhattaýǵa baǵyttalǵan «Jeti jurttyń tilin bil» atty baıqaý ótti, dep habarlaıdy «QazAqparat» HAA-nyń Qytaıdaǵy menshikti tilshisi.

Baıqaý QR Tuńǵysh Prezıdenti kúnine oraı SShTÝ janyndaǵy «Qazaqstan ortalyǵynda» uıymdastyryldy. Qatysýshylarǵa - 1-inshi kýrs stýdentterine Qazaqstan Prezıdenti Nursultan Nazarbaevtyń ómir jáne eńbek jolyn baıandaıtyn «Elin súıgen, eli súıgen Elbasy» fılmi kórsetildi. «Rýhanı jańǵyrý» baǵdarlamasynyń negizgi tarmaqtary  talqylandy.

Dıktant jazý, mátindi mánerlep oqý jáne óleńdi jatqa oqý syndy úsh kezeńnen turǵan baıqaý qorytyndysy boıynsha, 1-oryndy An Kaısın, 2-oryndy - Chjan Venlın men ıÝe Beıleı, 3-oryndy - Chjan Sıao Shýen men Lı Tsıýno ıelendi.

«Bul konkýrs stýdentterdiń qazaq tilinen alǵan bilimine baǵa berip qana qoımaı, oqý protsesine degen qyzyǵýshylyqty arttyrdy», - dedi QazAqparatqa bergen suhbatynda L.N.Gýmılev atyndaǵy Eýrazııa ulttyq ýnıversıtetiniń muǵalimi, búginde SShTÝ-dyń qazaq  tili kafedrasynda jumys isteıtin Gúlııam Ospanqulova.

Eske salaıyq, Sıan shet tilderi ýnıversıtetinde «Qazaqstan ortalyǵy» men qazaq tili kafedrasy 2017 jyldyń 20 qyrkúıeginde Memleket basshysynyń «Rýhanı jańǵyrý» baǵdarlamasy aıasynda QHR-daǵy QR Elshiliginiń bastamasymen ashylǵan bolatyn.

Qazirgi tańda 21 qytaılyq stýdent qazaq tilin úırenip jatyr.