Qytaılyq shekaradan 100 aıfondy ishine tyǵyp ótpek boldy
ASTANA. QazAqparat - Qytaıda kıiminiń ishinde 102 aıfondy zańsyz alyp ótpek bolǵan boıjetken ustaldy, dep habarlady Kotaku. Ol Gonkong pen Shenchjen arasyndaǵy shekarada ustaldy.
Basylym habarlaǵandaı, boıjetkenniń syrtqy kelbetiniń shamadan tys úlken bolýy jáne kúnniń jyly bolýyna qaramastan qalyń kıinip alýy keden qyzmetkerleriniń kúdigin oıatqan.
Arnaıy júrgizilgen tekserý nátıjesinde qytaılyq boıjetkennen salmaǵy 20 keli bolatyn 102 aıfon tárkilendi. Ol aıfondardyń barlyǵyn ústine japsyryp, baılap alǵan.
Endi zańdy buzǵan boıjetken osy áreketi úshin úsh jylǵa deıin bas bostandyǵynan aıyrylýy múmkin.
