Qytaılyq SANY Group kompanııasy Qazaqstandaǵy jel energetıkasyn ınvestıtsııalaıdy
BEIJІŃ. QazAqparat - Qytaılyq SANY Group korporatsııasy Qazaqstannyń jel energetıkasyn ınvestıtsııalaýǵa múddeli. Bul týraly «QazAqparat» HAA-nyń Qytaıdaǵy menshikti tilshisine korporatsııanyń joǵary vıtse-prezıdenti Dýan Daveı aıtyp berdi.
«Bıyl Nursultan Nazarbaev Qazaqstan halqyna arnaǵan Joldaýynda Qazaqstanda óndiris salý úshin Qytaımen birlesken ınvestıtsııalyq baǵdarlamasyn tıimdi júzege asyrý qajettigin atap ótti. Bul qytaılyq bıznesti yntalandyra túsip, eki eldiń kásipkerleri arasyndaǵy yntymaqtastyqtyń bolashaǵyna jol ashady. Bizdiń kompanııa Qazaqstanda qurylys tehnıkalaryn jetkizýdi qamtamasyz etý salasynda turaqty túrde jumys jasap keledi. Jaqynda ǵana qazaqstandyq áriptestermen jel energetıkasy salasyndaǵy jobany birigip qarjylandyrý týraly kelisim jasastyq. Jýyq arada Qazaqstanǵa delegatsııa jiberemiz», - dedi ol.
Kásipker QR-nyń QHR-daǵy Elshisi Shahrat Nuryshevpen kezdeskenin eske alyp, Qazaqstandaǵy mashına jasaý salasyndaǵy ınvestıtsııalyq josparlarymen bólisti.
Onyń aıtýynsha, Qazaqstan qytaılyq ınvestıtsııalar úshin mashına jasaý, temirjol jáne teńiz porty logıstıkasy, sondaı-aq «jasyl energetıka» salalarynda ońtaıly naryq bolyp tabylady.
