Qytaılyq otbasy qarııa qaıshymen qıyp tastaǵan 21 myń dollar aqshany úsh aı boıy jelimdep, qalpyna keltirgen
ASTANA. QazAqparat - Qytaıda jasy kelip qalǵan bir qart júz qyryq myń ıýandi ($21000) maıdalap kesip tastaıdy. Taıaýda ǵana úıin 200 myń ıýanǵa satqan qarııa ulynyń qolynda turý úshin kóship barǵan eken. Qomaqty somany ol óz bólmesinde tyǵyp ustaǵan.
Biraq, kún ótken saıyn aqshany balasy men kelini tartyp alatyndaı bolyp kóringen ol, aqyry 140 myń ıýandi (21 myń dollar) qaıshymen maıdalap kesip tastapty. Qalǵan alpys myń ıýandi de kespek bolǵan jerden ákesin balasy toqtatady. Aqyry sonshama somany ysyrap etpes úshin qarttyń áıeli men uly otyryp alyp, qıylǵan aqshany qaıta jelimdeýge kirisedi.
Olar ár kún saıyn keshki jetiden túngi saǵat on ekige deıin aqsha jamaýmen aınalysqan. Sóıtip, olar búkil aqshany úsh aıdaı ýaqyt boıy qurastyryp, jelimdep, bankke aparyp ótkizip, ornyna jańa banknotalar alǵan eken. Mańdaı termen bútindelgen qomaqty qarjyny otaǵasy qaıtadan túrtpes úshin otbasy bankke salyp tastapty, dep habarlaıdy informing.ru-ǵa siltememen 24.kz.
