Qytaılyq mıllıarder myńdaǵan kedeı-kepshikti meıramhanada tústenýge shaqyrdy
ASTANA. QazAqparat - Jomarttyǵymen aty shyqqan qytaılyq mıllıarder Chen Gýanbıao kúnkóris jaǵdaılary tómen myńdaǵan amerıkalyqtardy Nıý-Iorktegi meıramhanada ózimen birge túski as ishýge shaqyrdy.
Dámdi túski astan basqa qaıyrymdylyq sharaǵa kelgen ár adamǵa qosymsha syılyq - 300 dollar kóleminde qarajat salynǵan jabyqhat berilmek.
«Osylaısha Qytaıda baılyqtyń býyna mastanbaǵan atyna laıyqty qaıyrymdy jandar bar ekenin kórsetkim keledi», - dep aǵynan jaryldy mıllıarder South China Morning Post gazetinde.
Onyń aıtýynsha, bul shaqyrýǵa kúni búginge deıin 250-den astam adam ún qatqan. Qaıyrymdylyq asy 25 maýsymda Nıý-Iorktiń Ortalyq saıabaǵyndaǵy «Boat haýs» meıramhanasynda ótedi. Kesh ıesi óz qonaqtaryna Maıkl Djeksonnyń «We Are the World» hıtin oryndap bermekshi.
