Qytaılyq memkompanııalar basshylary ortasha jylyna 100 myń dollar alady
ASTANA. QazAqparat - Qytaıdyń memlekettik keńesi eldiń memlekettik kásiporyndaryn basqaratyn tulǵalardyń jalaqy deńgeıi týraly derekterdi jarııalady, dep habarlady jergilikti BAQ-qa silteme jasap "Kommersant".
Korporatıvtik basshylyqtyń birqatar ókilderiniń eń kóp jyldyq tabysy 1 mln ıýandy (144 myń dollar), eń azy - 40-50 myń ıýandy quraıdy. Statıstıkaǵa sáıkes memlekettik sektor dırektorlary arasynda 15 adam ǵana mıllıondyq tabys alady.
Atap aıtqanda, bul topqa China Merchants Group basqarmasynyń tóraǵasy Lı Tszıanhýn da jatady. Onyń bir jyldyq jalaqysy 1,2 mln ıýandy ($172,8 myń) quraıdy. 40 shaqty basshy 800 myń ıýan alatyn bolyp shyqty. Olar negizinen, elektrmen jabdyqtaý salasyndaǵy kásiporyndardy basqaratyndar.
Qytaı úkimetiniń derekterine sáıkes memlekettik kompanııalar dırektoratynyń jyldyq jalaqy deńgeıi 500-700 myń ıýandy (72-100 myń dollar) quraıdy. Jergilikti sholýshylar atap ótkendeı, memlekettik sektor boıynsha jarııalanǵan tabys deńgeıi Qytaıdyń birqatar jeke kompanııalarynyń basshylaryna qaraǵanda, birneshe ese tómen bolyp shyqty.
Eske salsaq, Forbes basylymy qarashada reseılik kompanııalardyń eń kóp tabys tabatyn basshylarynyń jyl saıynǵy reıtıngin usyndy. Birinshi orynda «Gazprom» basshysy Alekseı Mıller - - $17,7 mln. «Rosneftı» prezıdenti Igor Sechın - ekinshi orynda ($13 mln). Úshinshi orynda Sberbank basshysy German Gref ($11 mln), tórtinshi - ONEKSIM tobynyń bas dırektory Dmıtrıı Razýmov, besinshi - USM Advisors-tan Ivan Streshınskıı - olardyń tabysy - $10 mln.
