Qytaılyq kompanııalar Qazaqstanda ІT-startap jobalaryn júzege asyra alady -Elbasy

BEIJІŃ. QazAqparat - Qytaılyq kompanııalardyń Qazaqstanda ІT-startap salasyndaǵy jobalardy júzege asyrýyna qolaıly jaǵdaı jasalady. Bul týraly búgin Qytaıǵa memlekettik sapary aıasynda osy eldiń bıznes kapıtandarymen kezdesken Elbasy Nursultan Nazarbaev aıtty, dep habarlaıdy QazAqparat tilshisi.

«Qazaqstan ekonomıkasyn jedel jańǵyrtýǵa jáne ınnovatsııanyń jańa tehnologııalaryn engizýge baǵyt aldy. «Tsıfrlyq Qazaqstan» dep atalatyn arnaıy memlekettik baǵdarlama júzege asyrylýda. Osyǵan baılanysty ekonomıka salalaryn tsıfrlandyrý, ınnovatsııalyq ekojúıeni damytý boıynsha jobalardy júzege asyrý mańyzdy», - dep atap ótti Elbasy.

Osy oraıda Memleket basshysy elimizde Nazarbaev Ýnıvresıteti, Innovatsııalyq tehnologııalar parki syndy ınnovatsııalyq klasterlerdiń jumys iste jatqandyǵyn basa aıtty.

«Aǵymdaǵy jyly Astanada ІT-startaptar halyqaralyq tehnoparki ashylady. Munyń barlyǵy da sizdermen yntymaqtastyǵymyzdyń keleshegi zor alańy bola alar edi. Biz qytaılyq kompanııalardyń jumysy úshin qolaıly jaǵdaı jasaýǵa daıynbyz», - dedi Nursultan Nazarbaev.
Aıta keteıik, Elbasy Nursultan Nazarbaev Qytaıǵa memlekettik saparmen kelip, keshe QHR Tóraǵasy Sı Tszınpınmen keńeıtilgen quramda kelissózder ótkizdi.

Nátıjesinde birneshe qujatqa qol qoıyldy.

Sonymen qatar Memleket basshysy QHR Memlekettik keńesiniń premeri Lı Ketsıanmen júzdesti.

Al 10 maýsym kúni QR Prezıdenti Tsındao qalasynda ótetin Shanhaı yntymaqtastyq uıymyna múshe memleketter basshylarynyń keńesine qatysady dep kútilýde.