Qytaılyq kompanııa qyzmetkerlerine aryqtaǵany úshin syıaqy tóleıdi
ASTANA. QazAqparat - Sıan qalasynda kompanııa dırektory qyzmetkerlerin artyq salmaqtan arylýyna yntalandyrý úshin erekshe tásil oılap tapty.
Kompanııada aı saıyn aryqtaý boıynsha baıqaý ótedi. Syıaqy 1,5 keliden bastap beriledi. Ár 500 gramm úshin 100 ıýan tólenedi, dep habarlady «Jenmın Jıbao» gazeti.
Kompanııa qyzmetkeri Chjoý Veıdiń aıtýynsha, «aryqtaǵany úshin syıaqy tóleý» 1 naýryzdan bastalǵan. Ár aıda kompanııanyń jartysyna jýyq qyzmetkerleri syıaqy alady, ol ózi 2 aıda 10 keli tastap, 2000 ıýan syıaqy aldy.
Onyń sózine qaraǵanda, bul shara kútkennen de artyq nátıje berýde.
«Qyzmetkerler bul sharaǵa aqshalaı kótermeleýge qyzyǵyp qatysyp jatqan joq, syıaqy engizgen sebebimiz kópshiligi aryqtaý týraly aıtady da ol oryndalmaı, sóz kúıinde qalady. Aqshalaı marapat - qozǵaýshy kúsh bolýda», - dedi kompanııa prezıdenti Van Sıýeıýı.
