Qytaılyq kompanııa Aqtóbede tekserý jabdyqtaryn shyǵaratyn zaýyt salady
AQTÓBE. QazAqparat - Aqtóbe oblysyna «NUCTECH» kompanııasynyń vıtse-prezıdenti Lı Tszıanmın kelip, oblys ákimi Berdibek Saparbaevpen kezdesti. Qytaılyq kompanııa rentgen zaýyty aýmaǵynda nemese ındýstrııaldyq aımaqta medıtsınalyq tekserý jabdyqtaryn shyǵarmaq, dep habarlaıdy QazAqparat tilshisi.
Aqtóbe oblysynyń ákimdiginde oblys ákimi Berdibek Saparbaev pen «NUCTECH» kompanııasynyń vıtse-prezıdenti Lı Tszıanmın kezdesti. Jospar boıynsha «Aqtóbebrentgen» AQ bazasynda birlesken kásiporyn nemese «Aqtóbe» ındýstrııalyq aımaǵynda jańa zaýyt salynady.
«Sizdiń kompanııańyz Qazaqstanmen 10 jyldan astam ýaqyttan beri yntymaqtastyqta jumys istep keledi. Aqtóbe oblysy osy jobany júzege asyrýǵa múddeli jáne qoldanystaǵy zańnama aıasynda jan-jaqty qoldaý kórsetýge daıyn», - dedi oblys ákimi Berdibek Saparbaev.
Kezdesýde qytaılyq ınvestorlarǵa óńirdiń artyqshylyqtary, onyń ishinde geografııalyq ornalasýy, kólik jáne logıstıkalyq ınfraqurylymy túsindirildi. Berdibek Saparbaev «Aqtóbe» ındýstrııalyq aımaǵy, «Aqtóbe» ÁKK jáne Investorlarǵa qyzmet kórsetý ortalyǵy týraly aıtyp berdi. Al Lı Tszıanmın yntymaqtastyqty keńeıtýge qyzyǵýshylyǵy bar ekenin aıtyp ótti. Joba «Nurly jol» baǵdarlamasynda aıtylǵan «Bir beldeý - bir jol» bastamasy aıasynda iske asyrylady.
«Biz «Aqtóberentgenniń» óndiristik bazasymen tanystyq. Rentgen zaýytynyń óndiristik bazasy jaqsy eken. Qazirgi kezde biz zaýyt qyzmetkerlerin Qytaıǵa shaqyryp, kompanııamen jiti tanysýdy usynyp otyrmyz. Osydan keıin yntymaqtastyq máselelerin egjeı-tegjeıli talqylaı alamyz», - dedi L. Tszıanmın.
Aqtóbe oblysy ákiminiń baspasóz qyzmetiniń habarlaýynsha, 1997 jyly qurylǵan «NUCTECH» kompanııasy joǵary tehnologııalyq qaýipsizdik tehnıkasyn ázirleýge jáne óndirýge mamandanǵan. Búgingi kúni kompanııa ónimderi álemniń 122 eline jetkiziledi. Al ınvestorlarmen aradaǵy kelisim oblys ákimi Berdibek Saparbaevtyń Qytaıǵa sapary kezinde jasalǵan bolatyn.
