Qytaılyq klýb Ronaldý úshin 300 mln eýro usyndy
ASTANA. QazAqparat - Qytaı fýtbol klýby madrıdtyq «Realdyń» shabýylshysy Krıshtıaný Ronaldýny ózine aýystyryp alý úshin 300 mln. eýro usyndy, dep habarlaıdy QazAqparat Lenta.ru-ǵa silteme jasap.
«Madrıdtikterge transfer úshin 300 mln. eýro usynyldy, al Ronaldýnyń ózine jylyna 100 mln. eýrodan astam jalaqy tólemek. Biraq aqsha - eń mańyzdysy emes qoı. «Real» - bul onyń ómiri», - dep atap ótti forvardtyń agenti Jorje Mendesh Sky Sport-qa.
Ispandyq BAQ-tyń málimetinshe, Madrıdte Ronaldý aptasyna 427 myń eýro tabys tabady. Onymen bir mezgilde, ol álemdegi jalaqysy eń joǵary fýtbolshy bolyp tabylmaıdy. Eń úlken jalaqyǵa qytaılyq «Hebeı Forchýn» komandasynyń argentınalyq forvardy Esekıel Lavessı (aptasyna 577 myń eýro) ıe.
12 jeltoqsan kúni Ronaldý 2016 jyldyń qorytyndysy boıynsha «Altyn doptyń» ıegeri atanǵan bolatyn. Bul «Altyn dop» onyń mansabyndaǵy tórtinshisi (2008, 2013, 2014, 2016).
