Qytaılyq dárigerler jas qyzdyń aıaǵyn uzartyp berdi
ASTANA. QazAqparat - Ortalyq Qytaıda ornalasqan Hýnan provıntsııasynyń dárigerleri eki aıaǵy eki túrli qyzdyń aıaqtaryn birdeılep berdi, dep habarlaıdy «Sınhýa» aqparattyq agenttigi.
Osteomıelıt dertine, ıaǵnı súıektiń irińdi qabynýyna shaldyqqan Sıao Tszıýannyń bir aıaǵy ekinshisinen 23 santımetrge qysqa bolǵan. Sonyń kesirinen ol aqsańdap, bala kezinen aıaǵyn durys basa almaıtyn. Tórt kúrdeli operatsııadan keıin qyzdyń deformatsııalanǵan sol jaq aıaǵy oń jaǵymen teńestirildi. Alǵashqy 3 ota aıaq súıekterin uzartýǵa baǵyttalsa, sońǵysynda aıaq býyndary aýystyryldy. Osylaısha dárigerlerdiń arqasynda boıjetken eki aıaǵyn teń basty. 3 aı em alǵannan keıin ol kópten bergi armanyna jetedi, óz qatarlastarymen birdeı júrip, júgire alady.
