Qytaılyq dárigerler koronavırýspen kúreste qandaı tájirıbelerimen bólisedi
«Qazaqstan men Qytaıdyń Memleket basshylarynyń 9 sáýirdegi kelisimine sáıkes ártúrli mamandyq ıeleri sanatyndaǵy 10 adamnan turatyn qytaılyq delegatsııa elimizge keldi. Olardyń ishinde ıntensıvti terapııa, ınfektsııalyq baqylaý, pýlmonologııa, epıdemıologııa, qoǵamdyq densaýlyq saqtaý salasyndaǵy mamandar bar. Sonymen qatar delegatsııa quramynda jańa koronavırýs ınfektsııasymen kúreste tájirıbesi bar medbıke de keldi. Qytaılyq delegatsııanyń baǵdarlamasy óte mazmundy. 15 kúnge sozylady. Olar kópbeıindi aýrýhanalar men klınıkalardy aralap, ártúrli mamandyqtaǵy dárigerlermen onlaın-trenıng ótkizedi. Qytaılyq delegatsııamen tájirıbe almasý úshin aýdandyq deńgeıge deıingi medıtsınalyq qyzmetkerlerimizdi tartyp otyrmyz», - dedi Botagóz Jaqselekova onlaın rejımde OKQ-da ótken baspasóz máslıhatynda.
Onyń aıtýynsha qytaılyq dárigerler medıtsınalyq JOO-larda kezdesý men baspasóz máslıhattaryn da ótkizedi.
«Qytaılyq sarapshylar KVI-men kúreste óz tájirıbesimen bólisedi. Koronavırýs ınfektsııasy boıynsha aldyn alý jáne ony baqylaýdyń óz modeli týraly aıtyp beredi. Mamandar vırýsty anyqtaý algorıtmi, baılanysta bolǵan adamdardy oqshaýlaý, Qytaıdaǵy epıdemıologııalyq zertteý ádisterin paıdalaný, emdeý hattamalary men dıagnostıka, medıtsınalyq qyzmetkerdiń vırýs juqtyrýyn boldyrmaý amaldary jaıly aıtady», - dedi ol.