Qytaılyq boksshy qandasymyz Tokıoda jekpe-jek ótkizbek

  ASTANA.QazAqparat - Qytaıda turatyn 23 jastaǵy kásipqoı qazaq boksshy Beısenbi Násıollauly (12-0-1, 5KO) kezekti jekpe-jegin qazan aıynda Japonııa astanasy Tokıoda ótkizedi, dep habarlaıdy QazAqparat tilshisi.

«Men rıngke 20 qazanda shyǵamyn. Qarsylasym japondyq  Rıkkı Naıto esimdi boksshy. Ol solaqaı. Bul jekpe-jek men úshin reıtıngtik kezdesý bolmaq. Eger jeńiske jetsem, jyl sońyna deıin taǵy bir kezdesý ótkizip,  WBC nusqasy boıynsha Azııa chempıony tıtýlyn qorǵaıtyn bolamyn», - deıdi Beısenbi QazAqparat tilshisine bergen jaýabynda.

26 jastaǵy Rıkkı Naıto kásipqoı boksqa 2011 jyly kelip, jalpy 19 kezdesý ótkizgen. Japondyq onyń 17- sinde jeńiske (6 nokaýt) jetip, 2 aıqasta jeńilgen. Ol bul kúnde sýper jeńil salmaqta álemdik reıtıngte 32-orynda tur.

Qytaılyq jankúıerler Golovkınniń izbasaryna balap «OneG» atap ketken Beısenbi Qazaqstandyq tanymal boksshy Qanat Islamnyń Qytaıdaǵy jerlesi. Qanattyń alǵashqy ustazy Murat Boshaıulynan tálim alǵan Beısenbi kásibı rıngte jalpy 12 kezdesý ótkizip, 11 aıqasta jeńiske jetken (5 nokaýt) jáne bireýinde teń túsken. Qandasymyz sońǵy jekpe-jeginde japondyq Taısho Ozaýany 10 raýndta upaı sanymen jeńip, WBA jáne WBC nusqasy boıynsha Azııa chempıony tıtýlyn (WBA International super lightweight title,WBC Asian Boxing Council Continental super lightweight title) ıelengen bolatyn.