Qytaılyq azamat mıllıarder otandasyna túri uqsas bolýy úshin operatsııa jasatqan
ASTANA. QazAqparat - Qytaıdaǵy Shenchjen qalasynyń turǵyny Alibaba Group negizin qalaǵan Djek Maǵa uqsas bolýy úshin plastıkalyq operatsııa jasatqan, dep jazdy Daily Mail.
Hýan Tszıan arnaıy Ońtústik Koreıaǵa saparlaǵan. Óziniń syrtqy túrin ózgertý jas jigitke bir mıllıon ıýanǵa tústi (145 myń dollar).
Satý boıynsha menedjer bolyp eńbek etetin er adam ózi pir tutatyn Djek Ma endi ózine kóńil aýdaryp, kezdesýge kelisetin shyǵar degen úmitte.
Qytaılyq ınternet paıdalanýshylar áleýmettik jelide mundaı ota jasatý aqylsyzdyq jáne oıǵa da kelmeıtin qadam degen pikirge toqtasyp otyr. Al ony kórgender Alibaba Group negizin qalaýshyǵa beınesiniń uqsamaıtyndyǵyn da aıtýda.
