Qytaılyq azamat Qazaqstanda jalǵan dıplommen jumys istegen
ASTANA. QazAqparat - Astana qalalyq sotynda Qytaı azamatyna qatysty ákimshilik is qaraldy. Ol Qazaqstanǵa jumysqa barý úshin jalǵan dıplomdardyń negizinde ruqsat qujattaryn alǵan, dep habarlaıdy QazAqparat tilshisi.
Sot materıaldaryna sáıkes, Ts. esimdi azamat Qazaqstanǵa jumys isteýge kelgen. Al ruqsat qaǵazdary ınjener mamandyǵy týraly jalǵan dıplomdardyń negizinde jasalǵan bolyp shyqty. Qazaqstan terrıtorııasynda jumys isteýge ruqsat alǵannan keıin ol Shykent qalasyndaǵy munaı kompanııasyna qara jumysshy bolyp qyzmetke turǵan. Osy ýaqytqa deıin sol jerde jumys istep kelgen.
«Astana qalasynyń mamandyrylǵan aýdanaralyq ákimshilik sotynyń qaýlysyna sáıkes, Ts. esimdi azamat Ákimshilik quqyq buzýshylyq týraly kodekstiń 517-baby, 5-bóligi boıynsha kináli dep tanylyp, Qazaqstan aýmaǵynan shyǵarý jazasyna kesildi. Sot sheshimi kúshine endi», - delingen sottyń resmı habarlamasynda.
