Qytaılyq áıel boran saldarynan Gýanchjoý-Ýhan reısiniń jalǵyz jolaýshysy boldy
ASTANA. QazAqparat - Chjan esimdi qytaılyq týrıst áıel Gýanchjoý-Ýhan reısiniń jalǵyz jolaýshysy boldy. Fox News-tiń habarlaýynsha, bul jaǵdaı China Southern Airlines kompanııasynyń ıeligindegi ushaqtyń ushýy boran saldarynan birneshe saǵat keıinge qaldyrylyp, Chjannyń joldaǵy serikteri basqa, buǵan deıingi reıstermen ketýinen keıin oryn alǵan.
Týrıst áıel óziniń ushýy týraly Weibo áleýmettik jelisinde baıandap, habarlamasyna birneshe sýret qosty. «Men ushaqta jalǵyzbyn! Iá! Tek men ǵana jolaýshy! Jáne ushaqtyń komandasy bar!», - dep jazdy Chjan.
Gýanchjoý provıntsııasynda qardyń mol túsýinen kóptegen reısterdiń keshiktirilgeni habarlanyp otyr. Atap aıtqanda, Chjan óz ushaǵyna otyrý týraly habarlamany 10 saǵat kútken. Qytaılyq jańa jylda (aqpannyń 7-nen 8-ne qaraǵan kúni) úılerine jetýge asyqqan ózge jolaýshylar basqa reısterge otyrdy.
