Qytaılyq áıel 10 jyl boıy denesindegi ınelermen ómir súrgen
ASTANA. QazAqparat - Qytaıda Alatan Sıa esimdi áıel adam 10 jyl boıy denesindegi bir ýys ınemen ómir súrip kelgen. Osynsha ýaqyt boıy ol denesiniń aýyratynyna shaǵymdanǵan, biraq onyń nelikten ekenin túsinbeı keldi.
Áıel adam rentgenniń arqasynda onyń túrli organdarynda qarapaıym is tigetin ınelerdiń bar ekenin endi ǵana bildi. Dárigerler olardy ókpe, baýyr men aıaqtaǵy býyndardan jáne birneshe ishki organdardan anyqtaǵan.
Sonymen birge, olar birneshe ıneniń áıeldiń júreginen nebári úsh sm alysta ornalasqanyn anyqtady, dep habarlady TSN.
Medıtsına qyzmetkerleri ınelerdiń kóbin alyp shyǵý op-ońaı deıdi. Alaıda júrek tusy, sonymen birge, búırek pen ókpe mańyndaǵy ınelerdi alyp tastaý úshin kúrdeli otalar jasaý kerek dep otyr. Inelerdi joıýdy qytaılyq dárigerler 28 myń dollarǵa baǵalap otyr.
Naýqas aýylda turady, fermadaǵy maldy baǵady. Sondyqtan da onyń mundaı aqshasy joq. Alaıda ol otaǵa qajetti somany jınaýdan úmitti.
«Burynǵy kúıeýim meni jıi uratyn. 2002 jyly men odan ketip qalyp, ata-anammen tura bastadym. Áke-sheshem úıde bolmaǵan kúni onyń kelip meni qatty urǵany sonshalyq, men esimnen tanyp qaldym. Ata-anam úıge qaıtyp kelgende burynǵy kúıeýim qashyp ketken. Al meniń janymnan olar bir ýys ıne tapqan. Inelerdiń meniń deneme suqqan sol bolýy kerek», - dep kúdiktenedi naýqas.
