Qytaılyq 600 gradýstyq peshke túsip, aman qaldy
ASTANA. QazAqparat - Gonkongtyq áıel 10 qyrkúıek kúni Daosıs ǵıbadathananyń 600 gradýstyq úlken ystyq peshine qulap, aman qaldy, dep habarlaıdy QazAqparat.
Sınhýa aqparattyq agenttiginiń habarlaýynsha, oqıǵa ornyna 4 mınýtta jetken qutqarýshylar áıeldi aman alyp qalǵan. Órt sóndirý mashınasy sýmen peshtiń temperatýrasyn tómendetip, úsh qutqarýshy áıeldi peshtiń ishine kirip alyp shyqqan.
Qutqarý jumystary nebári 3 mınýtta júrgizilgenimen, áıel qatty kúıip qalǵan. Dárigerler onyń jaǵdaıyn aýyr dep baǵalap otyr. Sondaı-aq, úsh qutqarýshy da túrli deńgeıde kúıik jaraqatymen aýrýhanaǵa jetkizilgen.
Jergilikti polıtsııanyń aıtýynsha, áıel óz-ózine qol jumsamaqshy bolýy múmkin.
Aıta keteıik, Qytaıdyń Daosıstik nanymy boıynsha, dúnıeden ótken adamdardyń týystary ǵıbadathananyń arnaıy peshi «Hýa Baýlý (化宝炉)» arqyly tasattyq beredi.
