Qytaılar ońtústikten shyǵatyn balǵa qyzyǵýshylyq tanytýda
ShYMKENT. QazAqparat - Qytaılyqtar ońtústikten shyǵatyn balǵa qyzyǵýshylyq tanytýda. Aspan asty eliniń kásipkerleri maqtaraldyq bal daıyndaýshylarǵa júz tonna ekologııalyq taza ónimge tapsyrys berdi. Jergilikti qojalyq sol suranysty óteý úshin jumys jasaýda, dep habarlaıdy QazAqparat HAA tilshisi.
Atap aıtqanda, Maqtaral aýdanyndaǵy sharýa Tillá Qaldarbekova «Yrys» mıkro kredıttik uıymynan 4,5 mıllıon teńge nesıe alyp, bal arasyn baǵatyn oryn daıyndaǵan. Mundaǵy mamandardyń sózinshe aralardyń bir uıashyǵynan jylyna 40 lıtr bal alýǵa bolady. Qojalyq búginde mundaǵy 300 uıashyqtan jylyna 15 tonnaǵa jýyq bal alýda eken.
«Aralar sýyqqa tózbeıdi. Bizdiń aýdannyń aýa-raıy basqa aımaqtarǵa qaraǵanda áldeqaıda jyly ári mundaǵy jaýyn-shashynnyń az bolýy - bal arany baǵýǵa óte qolaıly. Sondaı-aq, kermek, jantaq, jyńǵyl, maqtanyń gúlinen aralar nár alady. Ondaı ósimdikter munda óte kóp», - deıdi Marat Muratov.
Sharýa qojalyǵy mamandary bal aranyń ónimine degen suranys óte joǵary ekenin aıtady. Daıyn ónimdi Maqtaraldyń mektepteri men balabaqshalary-aq tolyqtaı satyp alady eken. Ónimniń lıtri - 1 000 teńge turady. Sondaı-aq, «Tehas baly» qaýymdastyǵy da osy sharýashylyqtyń balyn jıi satyp alady.
«Bir uıada bir analyq ara, birneshe júz atalyq ara jáne 100 myńǵa deıin jumysshy ara bolady. Urǵashy ara uıada urpaq ósiredi. Ol aralardyń ishindegi eń irisi, jyl maýsymyna qaraı denesiniń uzyndyǵy 20-25 mm, al salmaǵy 150-300 mg-ge jetedi. Táýligine 2-3 myń, maýsymyna 200 myńǵa jýyq uryqtandyrylǵan jumyrtqa salady. Uryqtanǵan jumyrtqadan urǵashy, jumysshy jáne analyq aralar, al uryqtandyrylmaǵan jumyrtqadan tek erkek aralar shyǵady» - deıdi Marat Muratov.
