Qytaıǵa jóneltiletin poıyzdan 31 mln teńgeniń júgin urlaǵandar ustaldy
NUR-SULTAN. QazAqparat – Qytaıǵa jóneltiletin poıyzdan 31 mln teńgeniń júgin urlaǵandar ustaldy. Bul týraly QR ІІM Kóliktegi polıtsııa departamenti bastyǵynyń orynbasary Nurjan Álibaev málim etti, dep habarlaıdy QazAqparat tilshisi.
Ótken jyldyń qyrkúıeginde Jezqazǵan stantsııasyndaǵy Jelilik polıtsııa bólimshesine júk pen qol júgin qabyldap-tapsyrýshydan habarlama túsken. Ol «Jińishke –Alashańqaı QHR» baǵytynda jóneltiletin júk poıyzynyń 3 vagonynan jalpy salmaǵy 85 tonnany quraıtyn 77 bıg-beg «ferroqorytpa» júgi jetispeıtindigin aıtqan. «Hrom» kompanııasyna osylaısha 31 mln teńge somasynda materıaldyq shyǵyn keltirilgen.
Qylmystyq is QR QK-niń 188-baby 4-bóligi 3-tarmaǵy (asa iri mólsherdegi urlyq faktisi) boıynsha Qaraǵandy-Suryptaý stantsııasyndaǵy jelilik polıtsııa bóliminde sotqa deıingi tergep-tekserýdiń biryńǵaı tizilimine tirkelgen.
QR ІІM Kóliktegi polıtsııa departamenti bastyǵynyń orynbasary Nurjan Álibaevtiń aıtýynsha, jedel-izdestirý is-sharasynyń barysynda Qaraǵandy oblysynyń 24-33 jas aralyǵyndaǵy bes azamaty ustaldy. Olardyń arasynda «Áskerılendirilgen temir jol kúzetiniń» kúzetshisi de bolǵan. Kúdikti óziniń sybaılastaryna júk vagondarynyń Jezqazǵan stantsııasyna keletin ýaqytyn habarlaǵan.
«Kólik polıtseıleri júkterdiń saqtalýyn qamtamasyz etýge tıis temir jol uıymdary qyzmetkerleriniń ózderi jasaıtyn urlyq faktileri kezdesetinin aıtady. Máselen, jyl basynan beri jyljymaly quramdardan júk urlaǵandary úshin «QTJ» UK» AQ-nyń 5 qyzmetkeri jáne «ÁTJK» AQ-nyń 3 qyzmetkeri ustaldy» - dedi Nurjan Álibaev.
Ustalǵandar urlanǵan júkti qapqa salyp, olardy Qaraǵandy qalasyna deıin tasymaldaý úshin aldyn ala 3 avtokólik pen «KamAZ avtokran» avtokóligin jalǵa alǵan.
«Tergeý barysynda kúdiktilerdiń kinási tolyq dáleldenip, Qaraǵandy oblysy Jezqazǵan qalalyq sotynyń úkimimen olarǵa 5 jylǵa shartty túrde bas bostandyǵynan aıyrý jazasy taǵaıyndaldy», - deıdi departament bastyǵynyń orynbasary.
