Qytaıǵa jóneltiletin bıdaı kólemi artýy múmkin – AShM

NUR-SULTAN. QazAqparat – Bıyl elimizde 16 mln tonna dándi daqyl jınalady. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Bıyl dándi daqyldar 15,9 mln gektar alqaptan jınalatyn bolady. Oblys ákimdikteriniń málimetterine sáıkes ónimdilik gektarynan 10,1 tsentner bolǵanda dándi daqyldardyń boljamdy jalpy túsimi shamamen 16 mln tonnany quraıdy»,- dedi ol.

Mınıstrdiń aıtýynsha, ótken jyldardyń aýyspaly qaldyqtaryn eskergende, dándi daqyldar óndirisiniń boljamdy kólemi eldiń ishki qajettilikterin tolyqtaı qamtamasyz etýge múmkindik beredi.

«Jańa maýsymda dástúrli túrde qazaqstandyq bıdaı men un Orta Azııa, Iran men Aýǵanstan naryqtaryna jiberiletin bolady. Astyq sapasynyń joǵary bolýynan Qytaıǵa jóneltiletin bıdaı (HI-Pro) kólemi artýy múmkin», - dedi Erbol Qarashókeev.