Qytaıǵa jer satylmaıdy, jalǵa da berilmeıdi - mınıstr A.Kúrishbaev
ASTANA. Aqpannyń 3-i. QazAqparat /Aıdar Ospanalıev/ - Qytaıǵa jer satylmaıdy, jalǵa da berilmeıdi. Bul týraly búgin Parlament Senatynda ótken Úkimet saǵatynda Aýyl sharýashylyǵy mınıstri Aqylbek Kúrishbaev málim etti,
dep habarlaıdy QazAqparat.
Úkimet saǵatynda A.Kúrishbaevtyń aýylsharýashylyǵy salasynda atqarylyp jatqan máseleleri jónindegi baıandamasyn tyńdaǵan depýtattar mınıstrge osy sala boıynsha ózderin tolǵandyrǵan máseleler jóninde saýal joldaǵan bolatyn. Senator Ǵarıfolla Esimniń aıtýynsha, Aýyl sharýashylyǵy mınıstrligi Qytaıǵa jer satýǵa qatysty máseleni aqparat quraldarynda ashyq kórsetip berdi. Onyń ústine jaqynda buǵan baılanysty Bas prokýratýra da óziniń málimdemesin jarııa etti. Jer satylmaıdy. «Soǵan qaramastan qazir qoǵamda jer satylmaǵanymen ol qytaılyqtarǵa jalǵa beriledi eken degen áńgime júr», dedi senator.
Depýtattyń atalmysh saýalyna jaýap bergen Aýyl sharýashylyǵy mınıstri A.Kúrishbaevtyń aıtýynsha, qytaılyqtar qazirgi tańda elimizden soıa satyp alýǵa yntaly. «Al soıa tek sýarmaly jerlerde ósedi. Bizdegi sýarmaly jerlerdiń barlyǵy bos emes. Ekinshiden, bizdiń zańdarymyz boıynsha jerdi qosalqy jalǵa berýge tyıym salynǵan. Sondyqtan jerdi eshkim de jalǵa bere almaıdy. Qoryta aıtqanda, biz Qytaımen kelissózder júrgizý barysynda olarǵa naqty túsindirdik. Qazaqstan Qytaımen tek soıany satý máselesin ǵana qaraı alady. Biz osy baǵytqa qarjy bólý jaǵyn da qarastyrýymyz múmkin. Biraq jermen baılanysty eshqandaı da másele talqylanbaıdy. Biz jalǵa berý máselesin de qaramaımyz. Ol múmkin emes», dep túıdi sózin Aýyl sharýashylyǵy mınıstri.
