Qytaıǵa zańsyz altyn tasymaldaıtyn qylmystyq top ustaldy
ASTANA. QazAqparat - Zańsyz óndirilgen altyndy kontrabandalyq jolmen Qytaıǵa shyǵaratyn qylmystyq top ustaldy, dep habarlaıdy QazAqparat UQK baspasóz qyzmetine silteme jasap.
Qazaqstan Respýblıkasy UQK uzaq ýaqyt boıy zańsyz óndirilgen altyndy kontrabandalyq jolmen Qytaıǵa shyǵarýmen aınalysqan uıymdasqan qylmystyq top áreketiniń jolyn kesti.
"Almaty, Astana jáne Stepnogorsk qalalarynda arnaıy operatsııa júrgizý barysynda top músheleri, onyń ishinde Qytaıdyń 1 azamaty ustaldy. «Altynkól» stantsııasynda jalpy salmaǵy 106 tonna altyndy keni bar 2 vagon anyqtaldy. Olardan jalǵan qujattama alyndy.
Altyn kenin saqtaý jáne qaıta óńdeý úshin paıdalanǵan qoıma úı-jaılaryna tintý is-sharalary júrgizildi. Altyndy zertteıtin zańsyz zerthana tabyldy", - delingen baspasóz paraǵynda. 
Osy fakt boıynsha sotqa deıingi tergeý bastaldy, birqatar saraptama taǵaıyndaldy. 
