Qytaıǵa taǵy 78 qazaqstandyq kásiporyn zyǵyr tuqymyn eksporttaı alady – QR AShM
Osylaısha, qazirgi ýaqytta 103 zyǵyr tuqymyn óndirýshi (onyń 78-i QR AShM kepildigimen) jáne bıdaı unyn óndiretin 94 kompanııanyń (64-i QR AShM kepildigimen) óz ónimderin Qytaıǵa eksporttaýǵa quqyǵy bar.
«Esterińizge sala keteıik, ótken jyly Qytaıda ótken «Bir beldeý, bir jol» halyqaralyq yntymaqtastyq forýmy barysynda bıdaı unynyń eksporttyq partııalaryna qoıylatyn fıtosanıtarlyq talaptar jónindegi hattamaǵa, al Memleket basshysynyń Beıjińge sapary aıasynda Qazaqstannan Qytaıǵa eksporttalatyn zyǵyr tuqymyna qoıylatyn fıtosanıtarlyq talaptar jónindegi hattamaǵa qol qoıylǵan bolatyn. Qujattarǵa qol qoıylǵannan keıin qytaı tarapy eksport quqyǵy bar kásiporyndardyń tizilimine bıdaı uny men zyǵyr tuqymyn óndiretin 55 kompanııany engizdi. Hattamalar qazaqstandyq aýyl sharýashylyǵy taýarlaryn óndirýshilerge ónimdi jeńildetilgen tártippen eksporttaý quqyǵyn beredi»,-delingen habarlamada.
Sonymen qatar onda sońǵy jyldary Qazaqstan fermerleri arasynda zyǵyr egý keńinen tarap kele jatqandyǵy aıtylǵan.
«Bul daqyl óndiriste asa qymbat emes ári kúı talǵamaıdy. Sondyqtan respýblıkada óndiris kólemi de, zyǵyr egýmen aınalysatyn aýyl sharýashylyǵy taýaryn óndirýshilerdiń de sany artýda. Alaıda, bul daqyldy qarqyndy egý saldarynan óńdelgen topyraqtyń tez sarqylý qaýpi bar. Birneshe jyl ishinde Qazaqstan zyǵyr tuqymy men zyǵyr maıynyń iri eksporttaýshysyna aınaldy - jyl saıyn barlyq daqyldar satyp alynyp, Eýropa men Azııanyń birqatar elderine eksporttalady. Qazaqstandyq zyǵyrdyń iri ımporttaýshylarynyń biri – QHR»,-dep jazady baspasóz qyzmeti.