Qytaıǵa kúnjara men jońyshqa eksporttaý talaptary kelisiledi
Onyń aıtýynsha, mınıstrlik otandyq ósimdik tektes ónimderdi álem naryǵyna jetkizýge fıtosanıtarııalyq kedergilerdi alý boıynsha jumystar júrgizip jatyr. Búgingi kúni bıdaıdy, bıdaı kebegin, soıa burshaǵyn eksporttaý jónindegi talaptar qytaı tarapymen kelisildi.
«Aǵymdaǵy jylǵy 22-29 sáýir aralyǵynda Qytaıǵa kúnjara men jońyshqa eksporttaýdy qalaıtyn Soltústik Qazaqstan, Shyǵys Qazaqstan, Pavlodar, Almaty oblystaryndaǵy kásiporyndardy qytaılyq sarapshylardyń tekserýi josparlanyp otyr, tekserý qorytyndysy boıynsha kórsetilgen ónim túrlerine qoıylatyn talaptar jobasy kelisiletin bolady. Maýsym aıynda júgeri men arpaǵa tekserý júrgiziledi dep kútilýde. Osyǵan baılanysty oblystar ákimdikterinen qytaı mamandarymen ınspektsııa júrgizýge kómek kórsetýlerin suraımyz», - dedi ol.
Arman Evnıevtiń aıtýyna qaraǵanda, ósimdikter karantıni jónindegi ınspektorlardyń jumys qaǵıdatyn sertıfıkat berýden eldiń fıtosanıtarııalyq qaýipsizdigin qamtamasyz etý turǵysynan ózgertý qajet. Ol úshin osy protsesti avtomattandyrý kerek.
«Sondaı-aq, fıtosanıtarııalyq sertıfıkattardy berý boıynsha jańa tásilder ázirlendi. Atalǵan ózgerister karantınge jatqyzylǵan ónimderdi qadaǵalap otyrý qaǵıdatyn engizýge jáne fıtosanıtarııalyq táýekeldi taldaý negizinde sertıfıkat berý protsesin avtomattandyrýǵa, karantınge jatqyzylǵan ónimderdi óndirýmen, óńdeýmen, tasymaldaýmen aınalysatyn aýyl sharýashylyǵy taýaryn óndirýshilerdiń jaýapkershiligin arttyrýǵa múmkindik beredi», - dedi vıtse-mınıstr.