Qytaıǵa Qazaqstan astyǵyn tasý úshin arnaıy kvota alý kerek - M. Orazaev
ASTANA. Qazannyń 30-y. QazAqparat /Qanat Mámetqazyuly/ - Qytaıǵa Qazaqstan astyǵyn tasymaldaý úshin arnaıy kvota alý kerek. Bul týraly búgin QR Parlamenti Senatynyń jalpy otyrysynda Aýyl sharýashylyǵy vıtse-mınıstri Marat Orazaev málim etti,
dep habarlaıdy QazAqparat.
«Buǵan deıin Qytaı men Qazaqstannyń arasynda azyq-túlik korporatsııasy deńgeıinde qytaılyq kompanııamen kelisimshart túzilgen bolatyn. Bul kelisim 2008 jyldyń basynda jasalyp, onda elimizden 10 myń tonna bıdaıdy tasymaldaý týraly aıtylǵan edi. Búgingi kúni qytaılyq tarapqa bunyń tekserý bóligi úshin shamaly bıdaı jiberilgen. Sol boıynsha olar sheshim qabyldaýy tıis. Al eki memlekettiń úkimet basshylary deńgeıindegi astyq satyp alý týraly kelisimine sáıkes, Qazaqstannyń Qytaıǵa bıdaı tasymaldaýy úshin arnaıy kvota alýy tıis eken. Bul kvotany da sol eldegi memlekettik komıssııa sheshetin túri bar. Degenmen, jaqyn aralyqta Qazaqstan-Qytaı yntymaqtastyq komıtetiniń otyrysy ótetini belgili. Syrtqy ister mınıstrligi arqyly astyq tasymaldaý máselesin shapshańdatý, 2010 jyldan bastap astyq alýǵa kvota alý týraly máseleni sol jıynnyń kún tártibine engizgeli otyrmyz», dedi M. Orazaev.
Sonymen birge, Ekonomıka jáne bıýdjettik josparlaý mınıstri Baqyt Sultanov astyq satyp alýǵa qatysty aǵymdaǵy bıýdjetten 5 mlrd. teńgege jýyq qarajat bólingenin aıta kele, qazirgi ýaqytta rekordtyq astyqty ysyrap qylmaý tetikteri qarastyrylyp jatqanyn atap ótti.
«Qazirgi kúni astyq problemasyn sheshý úshin ony satyp alý mólsherin 3 mln. tonnadan 4-5 mln. tonnaǵa deıin arttyrý joldary da qaralýda», dedi B. Sultanov.
