Qytaıǵa qaraǵanda Qazaqstanda bıznes úshin jaqsy jaǵdaı jasalǵan - San-Ho Shın

ASTANA. QazAqparat - Astanada bastalǵan Qazaqstan - Koreıa iskerlik keńesiniń VI otyrysynda keńestiń teń tóraǵasy San-Ho Shın aǵynan jarylyp, káris kásipkerleriniń qazaq jerinde jumys istegisi keletinin jetkizdi. Sebebi bul jerde bıznes úshin barlyq jaǵdaılar jasalǵan. Osy oraıda «Kolon World Investment» kompanııasynyń prezıdenti Shın myrza óz jerlesterine memleket tarapynan barynsha kómek kórsetýdi surady, dep xabarlaıdy QazAqparat tilshisi.

«Biz Qytaı, Indonezııa, Vetnam jáne taǵy basqa memleketterde jumys isteımiz, biraz jetistikterge de jettik. Alaıda qazir salystyryp otyrsaq, Qazaqstanda odan da jaqsy jaǵdaılar jasalady eken. Búgingi otyrysqa Investıtsııalar jáne damý vıtse-mınıstri Qaıyrov myrza da qatysyp otyr. Sondyqtan osy múmkindikti paıdalanyp, káris kompanııalaryna qoldaý jasaýyńyzdy suraımyn. Men kóp nárse suramaımyn. Bizge tek qoldaý ǵana qajet. Máselen, vıza men ruqsat alý jaǵynan, sosyn káris kásipkerleri Qazaqstan zańnamasynyń keıbir tustaryn bilmegendikten, birqatar qıynshylyqtarǵa tap bolyp jatady. Menińshe, Qazaqstanda basqaǵa úlgi bolatyn kompanııalardyń sanyn kóbeıtý kerek. Sonda basqa munda ınvestorlar da kóptep kele bastaıdy», - deıdi San-Ho Shın.

Onyń aıtýynsha, búginde káris kompanııalary Qazaqstandaǵy jekeshelendirý naýqanyna da, memlekettik-jekeshelik seriktestik jobalaryna da qatysýǵa daıar.

«KazakhInvest» AQ basqarýshy dırektory Asqar Arynovtyń oıynsha, Shın myrzanyń ótinishi Qazaqstandaǵy kedergilerdi emes, káris bıznesiniń osynda kelýge degen qulshynysyn kórsetse kerek.

«Shyny kerek, búginde Koreıanyń iri jáne shaǵyn kompanııalary Qazaqstanda óz kásibin ashýǵa múddeli. Osy oraıda Shın myrza Indonezııany da, Vetnamdy da mysalǵa keltirdi. Alaıda Qazaqstanda bıznes úshin jasalyp jatqan jaǵdaılar áldeqaıda jaqsy. Sol sebepti ol káris kompanııalaryna barynsha jaǵdaı jasalǵanyn qalaıdy. Sosyn Shın myrza Qazaqstan-Koreıa iskerlik keńesiniń teń tóraǵasy, osy qyzmette de ol birlesken áriptestikti damytýdy kózdeıdi», - dedi Arynov QazAqparat tilshisine bergen suxbatynda.

Aıta keteıik, búgin Astanada Qazaqstan - Koreıa iskerlik keńesiniń VI otyrysy ótip jatyr.