Qytaıǵa asa qaýipti «Ýsagı» daýyly jaqyndap keledi
BEIJІŃ. 21 qyrkúıek. QazAqparat - «Ýsagı» taıfýny jeksenbi, 22 qyrkúıek kúni Qytaıdyń ońtústik-shyǵys jaǵalaýyna jetedi, dep habarlady ulttyq meteorologııalyq ortalyqtan.
Asa qaýipti «Ýsagı» taıfýnynyń jaqyndaýyna baılanysty Qytaıda tótenshe jaǵdaı jarııalandy. Boljam boıynsha, taıfýn QHR Gýandýn, Fýtszıan, Chjetszıan provıtsııalary men Gýansı-Chjýans avtonomdyq aýdandaryna jetip, saldarynan 22-23 qyrkúıek kúnderi qatty jel uıytqyp, nóser bolady.
Eldiń meteorologııalyq basqarmasynyń málimetteri boıynsha, «Ýsagı» saǵatyna 20 shaqyrym jyldamdyqpen jyljyp keletin kórinedi. Kúshti daýyldyń eń joǵarǵy jyldamdyǵy saǵatyna 195 shaqyrymǵa jetedi. Bıylǵy esep boıynsha, 19-shy «Ýsagı» taıfýny - Qytaıdyń ońtústik-shyǵys jaǵalaýlaryna soǵatyn kúshti daýyldardyń biri.
Qytaı bılik ókilderiniń málimdeýinshe, taıfýnnyń astynda qalýy múmkin aýdandar apatqa qarsy turýǵa tolyq daıyn.
