Qytaıdyń zııandy oıynshyqtaryna qashan tosqaýyl qoıylady? - J. Súleımenov
ASTANA. Qyrkúıektiń 15-i. QazAqparat /Qanat Mámetqazyuly/ - Halyqaralyq standarttarǵa saı emes, sapasyz ári zııandy Qytaı oıynshyqtaryna qashan tosqaýyl qoıylady? Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Jarasbaı Súleımenov osylaı málim etti.
«Sońǵy kezderi Qytaıdan jetkizilgen qaýipti oıynshyqtardyń qaýip-qaterge toly, quramynda adam aǵzasyna zııandy ýly hımııalyq zattardyń bar ekenin aıtyp, búkil álem dabyl qaǵýda. Dabyl qaǵyp qana qoıǵan joq, oǵan qarsy sharalar qoldanylyp jatyr. Máselen, búginde aspan asty elinde shyǵarylǵan oıynshyqtardyń Soltústik Amerıka men Avstralııanyń dúkenderinde satylýyna tyıym salynǵan. Sol sııaqty, Reseı Qytaı oıynshyqtaryn zertteý nátıjesinde onyń quramynda ýly hımııalyq zattardyń kóptigin anyqtaǵan soń, daıyn ónimderdi keri qaıtaryp, tipti osyǵan baılanysty arnaıy zań qabyldaǵan. Ókinishke qaraı, basqalarǵa kereksiz bolyp qalǵan osy oıynshyqtar bizdiń elimizge esh kedergisiz, tekserýsiz aǵylyp jatyr. Qolda bar derekterge súıensek, saýda núktelerine shyǵatyn oıynshyqtardyń 80-90 paıyzy qytaıdiki kórinedi», dedi depýtat.
Sonymen qatar, depýtat kórshi el asyp kelgen oıynshyqtar halyqaralyq standarttarǵa sáıkes kelmeıtinin, olardyń quramynda sábılerdiń densaýlyǵyna, ómiri men keleshegine qater tóndiretin ýly zattar asa kóp mólsherde ekendigin atap ótti. «Máselen, formaldegıd ádettegiden 10-15 esege deıin kóp. Jáne boıaýdyń quramynda fenol, qorǵasyn elementterimen qatar, hımııalyq ıngredıentter de kezdesetin kórinedi. Óıtkeni, oıynshyqtar negizinen hımııalyq óndiristiń qaldyqtarynan jasalynady. Al bul balanyń mıyn zaqymdap, kórý qabiletin tómendetip, kemtarlyqqa ushyratýy múmkin», dedi J. Súleımenov.
Onyń aıtýynsha, oıynshyq arqyly balanyń oılaý qabileti artady, sol arqyly ómirge beıimdeledi. Al sapasyz, zııandy oıynshyqtar balanyń jan-jaqty ósýine keri áserin tıgizedi. «Sondyqtan ult bolamyn degen, urpaǵyn oılaǵan el balalar oıynshyǵyna, ásirese, syrttan ákelinetin oıynshyqtyń sapasyna, qaýipsizdigine aıryqsha kóńil bólýge, qaterdiń aldyn alýǵa tıis. Sapasyz qytaı oıynshyqtaryna qashan tosqaýyl qoıylady jáne balalardy densaýlyqtaryna qaýipsiz otandyq oıynshyqtarmen qamtamasyz etý baǵytynda qandaı sharalar atqarylýda?», dedi saýalynda depýtat J. Súleımenov.
