Qytaıdyń jańajyldyq saýyq keshinde 2 qandasymyz óner kórsetti
Qytaıda 40 jyldan beri dástúrli ótkizilip kele jatqan jańajyldyq mereke kópshiliktiń kózaıymyna aınalyp úlgergen. Sınhýa agenttiginiń jazýynsha, 21 qańtar saǵat 24:00-degi jaǵdaı boıynsha, «Spring gala festival 2023» saýyq keshi tikeleı translıatsııasynyń ortasha reıtıngi 20,23%-dy quraǵan. Qytaı boıynsha 655 mıllıonnan astam adam saýyq keshti jańa medıalar arqyly tamashalaǵan. Bul kórsetkish ótken jyldarmen salystyrǵanda 47.7%-ǵa artyq. Al CCTV klıenti arqyly shoýdy kórýshiler sany 108 mıllıonnan asyp túsken. Qytaıdan ózge elderde CGTN arnasy arqyly 36 mıllıonnan astam adam kontserttik baǵdarlamany kórgen.
Bıylǵy konverttik baǵdarlamanyń betashar nómiri «Gúlder» ánin ótken jyly Qytaıdyń teleóner salasyndaǵy eń joǵary memlekettik marapat Flying Apsaras syılyǵyn jeńip alǵan qandasymyz Rıza Álimjanqyzy Djekı Chan, Ý Datszın sekildi óner-sport juldyzdarymen birge oryndady. Al Qytaıdaǵy etnıkalyq azshylyqtardyń ánshileri oryndaǵan «Bizdiń aýyl» ánine Altaı aımaǵynyń Án-bı ansambliniń ónerpazy Arshyn Baqatqyzy qobyzben súıemel jasady.
Sondaı-aq QazAqparat buǵan deıin Dımash Qudaıbergenniń CCTV telearnasyndaǵy atalmysh festıvalge Uly Jibek joly boıyndaǵy eldiń ókili retinde qatysqanyn jazǵan bolatyn.
Jalpy CCTV-diń dástúrli qytaılyq jańa jylǵa arnalǵan merekelik saýyq keshi Qytaıdaǵy eń mártebeli jáne kórermeni eń kóp telebaǵdarlamalardyń biri sanalady. Atalmysh kontsertte óner kórsetý Qytaıdaǵy óner juldyzdary úshin úlken mártebe.
