Qytaıdyń Tıantszın qalasynda taǵy jarylys boldy
ASTANA. QazAqparat - 12 tamyzda jarylystar serııasy men órt shyqqan Qytaıdyń soltústigindegi Tıantszın qalasyndaǵy qoıma mańynda taǵy jarylys oryn aldy. Bul týraly TASS Ortalyq qytaı televızııasyna silteme jasap habarlady.
Oqıǵa orny aýdanynda «aq tútin paıda boldy», jaqyn jerdegi áskerı qyzmetkerler qaýipsiz jerge shyǵaryldy dep habarlandy.
Tótenshe jaǵdaı «Jýıhaı» logıstıkalyq kompanııasynyń qoımasynda oryn alǵan bolatyn. 2 shaqyrym jerdegi úılerdiń tereze shynylary synyp, 1 myńnan astam avtomobılge zaqym keltirildi. Qýattylyǵy trotıl ekvıvalentinde 3 tonnany quraıtyn jarylystan keıin munda órt shyqty. Budan keıin qoımada taǵy birneshe jarylys oryn aldy. Eń kúshtisiniń qýattylyǵy trotıl ekvıvalentinde 21 tonnany qurady.
Qutqarýshylar 112 adamnyń máıitin tapty, 95 adam iz-túzsiz joǵalǵan dep eseptelýde. Oqıǵa ornynda tıisti jumystar úzdiksiz júrip jatyr.
