Qytaıdyń toǵyz provıntsııasynda halyq sany azaıyp jatyr

BEIJІŃ. QazAqparat – Qytaıdyń toǵyz provıntsııasynda halyq sany tabıǵı azaıyp jatyr. Buǵan QHR-diń 23 ákimshilik-aýmaqtyq bólinisindegi statıstıkalyq derekter dálel bolyp otyr, dep habarlaıdy QazAqparattyń menshikti tilshisi.

2021 jyldyń qorytyndysy boıynsha, Qytaıdyń toǵyz provıntsııasynda, sonyń ishinde Hebeı, Tszıansý, Hýnan, Hýbeı, Shansı, Heılýntszıan jáne basqalarynda halyqtyń tabıǵı azaıýy baıqalǵan.

Qytaı sarapshylary qazir demografııa salasynda negatıvti tendentsııalar qalyptasyp jatqanyn atap ótti.

«Qytaıda týý deńgeıi ǵasyrdan astam ýaqyt boıy tómendeıdi dep boljaýǵa bolady. «Úshinshi bala» saıasaty keıbir máselelerdi jeńildetýi múmkin, biraq ol qysqa merzimdi perspektıvada tendentsııany ózgertpeıtin shyǵar», - dedi qytaılyq demograf Hýan Venchjena «Hýantsıý shıbao» gazetine.

Onyń aıtýynsha, týý deńgeıi joǵary aýdandar negizinen ýrbanızatsııa deńgeıi tómen Qytaıdyń birqatar batys jáne ortalyq aımaqtarynda ornalasqan.

Demograftar Qytaı halqynyń azaıýyn bala týý jasyndaǵy jastar men áıelder sanynyń azaıýymen, sondaı-aq medıtsınalyq qyzmet pen bilimge jumsalatyn úlken shyǵyndarǵa baılanysty balaly bolǵysy kelmeıtin jastar sanynyń ósýimen túsindiredi.

Sonymen qatar, elde ajyrasýdyń joǵary deńgeıi baıqalady.

Qytaı Ulttyq statıstıka bıýrosynyń málimeti boıynsha, 2021 jyly týý koeffıtsıenti 1000 adamǵa shaqqanda 7,52 qurady. 2020 jyly bul koeffıtsıent 8,52 bolǵan.

2021 jyly Qytaı bıligi otbasylarǵa úsh bala tabýǵa ruqsat berdi.

Bul shara demografııalyq qurylymdy jaqsartý jáne el halqynyń qartaıýyna qarsy strategııany iske asyrý úshin qabyldandy.

Eske sala keteıik, 1970 jyldardyń aıaǵynan bastap QHR-da bala týýdy shekteýge baǵyttalǵan qatań demografııalyq saıasat júrgizildi.

Keıbir jaǵdaılardy esepke almaǵanda, otbasylarǵa tek bir bala tabýǵa ǵana ruqsat etildi.