Qytaıdyń taǵy bir megapolısinde koronavırýsqa baılanysty lokdaýn engizildi

BEIJІŃ. QazAqparat - 13 mıllıon halqy bar Sıan qalasynyń (Shensı provıntsııasy, QHR) bıligi senbiden seısenbige deıin ishinara oqshaýlaý engizý týraly sheshim qabyldady. Bul týraly jergilikti ákimshiliktiń habarlamasynda aıtylǵan, dep habarlaıdy QazAqparat tilshisi.

Terrakota jaýyngerler armııasymen álemge belgili Sıan qalasynyń ishinara jabylýyna ondaǵan koronavırýs ınfektsııasy sebep boldy. 15 sáýirdegi jaǵdaı boıynsha megapolıste COVID-19 ınfektsııasynyń 43 jaǵdaıy anyqtaldy.

Osy kezeńde meıramhanalar, barlar, sondaı-aq kóptegen mádenı, sporttyq jáne oıyn-saýyq oryndary jabylady.

Áleýmettik baılanystarǵa qatań shekteýler engizilýde. Sıan turǵyndaryna sırek jaǵdaılardy qospaǵanda, úılerinen shyǵýǵa tyıym salynady.

Kompanııalarǵa óz qyzmetkerlerin qashyqtan jumys isteýge aýystyrýǵa keńes berildi. Qoǵamdyq kólik pen taksıler qala ishinde ǵana jumysyn jalǵastyrady.

Jergilikti bılik shekteýlerdiń iskerlik ortadaǵy áleýmettik belsendilikke áserin azaıtýǵa ýáde berdi.

Sıan qalasynda álemdegi eń iri jartylaı ótkizgish óndirýshilerdiń zaýyttary ornalasqan.

Esterińizge sala keteıik, ótken jyldyń jeltoqsan aıynyń sońynda Sıan bir aıǵa jýyq ýaqytqa sozylǵan koronavırýsqa baılanysty lokdaýn jarııalaǵan bolatyn.

Buǵan deıin Qytaıdyń birqatar megapolısterinde koronavırýstyń taralýyna baılanysty oqshaýlaý engizilgeni habarlandy.

Shekteýler Qytaıdyń ońtústigindegi Gýandýn provıntsııasyndaǵy 17 mıllıon turǵyny bar Shenchjen megapolısinde engizildi.