Qytaıdyń taǵy bir qalasynda COVID-19 indetine baılanysty ishinara lokdaýn engizildi

BEIJІŃ. QazAqparat - Qytaıdyń soltústik-batysyndaǵy Gansý provıntsııasy Lanchjoý qalasynyń bıligi koronavırýs indetiniń taralýyn boldyrmaý maqsatynda jeti kúndik ishinara oqshaýlaý engizdi. Bul týraly indetke qarsy kúres jónindegi qalalyq shtabtan málimdedi, dep habarlaıdy QazAqparat.

Jergilikti densaýlyq saqtaý komıssııasynyń málimetinshe, indet bastalǵaly Lanchjoýda jalpy sany 140-tan astam adamnyń COVID-19 vırýsyn juqtyrǵany anyqtaldy.

Lanchjoý qalasynyń tórt aýdanynda shekteý engizildi. Túrli oıyn-saýyq oryndarynyń (ınternet-kafeler, karaoke barlar), sport zaldary, kınoteatrlar, kitaphanalar men murajaılardyń jumysy jeti kúnge toqtatyldy. Qoǵamdyq tamaqtaný oryndary tek alyp ketý nemese jetkizýdi uıymdastyryp jumys isteı alady. Bul aımaq turǵyndaryna úıde otyryp, qashyqtan jumys isteýge keńes etildi.

Epıdemıologııalyq qaýip deńgeıi tómen aýdandardyń turǵyndaryna azyq-túlik pen basqa da qajetti taýarlardy satyp alý úshin kúnine bir ret úıden shyǵýǵa ruqsat etilgen. Qalalyq qoǵamdyq kólik áli de jumys isteıdi. Ondaǵy jolaýshylar sońǵy 24 saǵat ishinde alynǵan koronavırýsqa teris PTR synamasyn usynýy tıis.

Buryn habarlanǵandaı, ótken aptada 13 mıllıon halqy bar Sıan megapolısinde (Shensı provıntsııasy, Soltústik-batys Qytaı) ishinara oqshaýlaý engizildi. Jergilikti BAQ habarlaýynsha, Sıandaǵy jańa COVID-19 indeti BA.5.2 omıkronynyń jańa qosalqy nusqasynan týyndaǵan.

Foto: news.cn