Qytaıdyń sońǵy jetistigi: Jylyna 13 mln adam kedeılikten qutylady
ASTANA. QazAqparat - Qazaqstan Respýblıkasynyń Ulttyq mýzeıinde Qytaı Halyq Respýblıkasynyń sońǵy bes jyldaǵy jetistikterine arnalǵan «Tańǵajaıyp Qytaı» fotokórmesi ashyldy, dep habarlaıdy QazAqparat tilshisi.
Qazaqstan Respýblıkasynyń Ulttyq mýzeıi men Qytaı Halyq Respýblıkasynyń Qazaqstandaǵy elshiligi uıymdastyrǵan bul fotokórme Qytaı Kommýnıstik partııasy men onyń kóshbasshysy Sı Tszınpınniń basshylyǵymen Qytaıdyń sońǵy bes jyldaǵy tarıhı jetistikterin kórsetýge baǵyttalǵan.
«Ulttyq mýzeı el astanasynda ornalasqan mádenı oryn retinde shet memleketterdiń Elshilikterimen birlesip, kóptegen mádenı sharalar uıymdastyrýda. Solardyń biri - búgingi «Tańǵajaıyp Qytaı» fotokórmesi. Qytaı kommýnıstik partııasy kópultty memleketti basqara otyryp, tarıhı reformalardy júrgizý, ekonomıka jáne saýda, ǵylym men tehnıka, halyqaralyq qatynastar jáne salalarǵa basa nazar aýdaryp, bolashaqqa nyq qadam jasap keledi. Dál osyndaı kórmelerdi uıymdastyrý arqyly, eki el arasyndaǵy saıası-ekonomıkalyq baılanystarmen qatar mádenı qarym-qatynastardy da arttyra alamyz. Aldaǵy ýaqytta da kóptegen sharalar atqaramyz degen senimdemiz», - dedi QR Ulttyq mýzeıi dırektorynyń mindetin atqarýshy Leonıd Kochetov.
Óz kezeginde Qytaı Halyq Respýblıkasynyń Qazaqstandaǵy Tótenshe jáne Ókiletti Elshisi Chjan Hanhýeı jeltoqsan aıynyń Qazaqstan memleketi úshin merekege toly aı ekenin atap ótip, barsha qazaqstandyqtardy kele jatqan meıramdarmen quttyqtady jáne qazan aıynda Beıjińde ótken Qytaı kommýnıstik partııasynyń HІH sezin erekshe atap ótti.
«Qazan aıynyń 18-24 kúnderi Beıjińde Qytaı kommýnıstik partııasynyń HІH sezi ótti. Bul Qytaı úshin tarıhı ári mańyzdy oqıǵa boldy. Osy sezde partııa tujyrymdamasyna jańa ózgerister engizilip, Qytaıdyń jańa sotsıalıstik baǵdarlamasyndaǵy belesterge qol jetkizý úshin jasalatyn josparlar bekitildi», - deıdi Chjan Hanhýeı.
Elshiniń aıtýynsha, sońǵy 5 jyldyń ishinde QHR basshylyǵy kedeılikti joıý boıynsha úlken is atqarǵan. Jylyna 13 mln-nan astam adam kedeılikten qutylady. JІÓ kórsetkishi de salystyrmaly túrde ulǵaıǵan. Sondaı-aq, Qytaı bıligi qazaqstandyq tarappen birlesip, taǵdyrlar men múddeler ortaqtastyǵyn qurýǵa daıyn. 
«Taǵdyrlar men múddeler ortaqtastyǵy degenimiz - Qytaı men Qazaqstannyń ózara tájirıbe almasýy, ásirese Qytaı óz damýyndaǵy tájirıbesimen bólisýi, birlese jumys isteý jáne atqarǵan isterdiń jemisterin birge kórý. Qytaı basshylyǵy Qazaqstanmen aradaǵy qarym-qatynasty joǵary baǵalaıdy jáne qazaq halqyna úlken dostastyqpen jáne yqylaspen qaraıdy», - dedi Elshi.
Sondaı-aq, Elshilik ókili kelesi jyldan bastap, Qytaı kórmesi boıynsha sharalardy aı saıyn ótkizip turý josparlanǵanyn habarlady.
«Kórmeler arqyly Qytaıdyń árbir provıntsııalaryn, kórikti mekenderin kóre alasyzdar. Qaı oryn týraly kelýshilerdiń qyzyǵýshylyǵy týsa, sol jer týraly qajetti aqparattardy berýge daıynbyz», - dep óz sózin túıindedi Chjan Hanhýeı.
