Qytaıdyń soltústik-shyǵys óńirlerinde energetıka tapshylyǵy týyndady

BEIJІŃ. QazAqparat – Qytaıdyń soltústik-shyǵysyndaǵy úsh provıntsııanyń bıligi osy aptada birneshe eldi mekende elektr qýatyn tutynýǵa shekteý qoıdy, dep habarlaıdy QazAqparattyń menshikti tilshisi.

Jergilikti BAQ-tyń habarlaýynsha, jaqyn aılarda qysqy aıaz jaqyndap, elektr qýatyna suranys artqan kezde Qytaıdyń soltústik-shyǵys óńirlerinde (Heılýntszıan, Tszılın jáne Lıaonın provıntsııalary) elektr qýatyn óshirý jıileı bastaıdy.

Bul jaǵdaı kómirdiń jetispeýshiliginen jáne energojúıege túsken salmaqtan bolady.

Yicai basylymynyń habarlaýynsha, Tszılın provıntsııasynda kelesi jyldyń naýryzyna deıin elektr qýaty óship otyrady. Lıaonın provıntsııasynyń ákimshilik ortalyǵy Shenıan qalasynda ótken aptadan bastap elektr qýatyn paıdalanýǵa shekteý engizile bastaǵan. Qalanyń keıbir aýdandarynda baǵdarshamdardyń jumys istemeýinen jol qozǵalysy qıyndaǵan.

Qytaıdaǵy kómir tapshylyǵy otynnyń osy túrin satyp alý baǵalarynyń ósýine alyp keldi. Soǵan baılanysty Qytaıdyń kómir elektr stantsııalary elektr qýatynyń óndirisin toqtatyp, asa kerek jaǵdaılarǵa únemdep qalýdy jón kóredi.