Qytaıdyń Sıan qalasyndaǵy mýzeıde «Altyn adam» kórsetildi
Sharany Qazaqstan Respýblıkasynyń Ulttyq mýzeıi men Shensı provıntsııasynyń Tarıhı mýzeıi «Altyn adamnyń búkil álem mýzeılerin sharlaýy» atty halyqaralyq kórmelik jobany júzege asyrý aıasynda uıymdastyrǵan.
Kórmeniń ekspozıtsııasyna «Altyn adam» ǵana emes, Esik qorǵanynan tabylǵan rýnıkalyq jazýy bar kúmis ydys, jarqyraǵan, bizdiń zamanymyzǵa deıin V-IV ǵasyrlarda soǵylǵan eki barys beınesi beınelengen beldik, XV ǵasyrdyń basynda jasalǵan biregeı zergerlik buıymdar, sonymen qatar Ortalyq Qazaqstandaǵy Taldy-ІІ qorǵanynda tabylǵan (bizdiń zamanymyzǵa deıin VII ǵasyrdyń ortasy) muralar qoıyldy.
Kórmege kelýshiler sondaı-aq 2012 jyldyń sáýir aıynda Batys Qazaqstan oblysynyń Taqsaı-1 kesheninde tabylǵan áıgili sarmat áıeliniń rekonstrýktsııalanǵan túrin (b.z.d. VI ǵasyrdyń sońy men V ǵasyrdyń ortasy) kóre alady.
Kórmege qoıylǵan buıymdardyń kópshiligi altynnan jasalǵan. Kóne muralar saq-sibir ań stıliniń jádigerlerine jatady.
Kórmeniń ashylý saltanatynda Shensı provıntsııasy gýbernatorynyń orynbasary Lý Chjııýan, Qazaqstan Respýblıkasynyń Qytaıdaǵy elshisi Shahrat Nuryshev, QR Parlament Májilisiniń depýtattary Amangeldi Dáýrenbaev pen Murat Temirjanov, Sıanda akredıtatsııadan ótken Ońtústik Koreıa, Taıland, Malaızııa men Kambodja elderiniń dıplomattary, Shensı provıntsııasynyń memlekettik organdarynyń, iskerlik jáne ǵylymı ortanyń, bilim jáne mádenı mekemeleriniń ókilderi kelip qatysty.
Kórme 2018 jyldyń 12 qyrkúıegine deıin jalǵasady.
Eske sala ketsek, «Altyn adamnyń búkil álem mýzeılerin sharlaýy» atty halyqaralyq kórmelik jobasy Belarýs elinen (Mınsk, 2017 jyl) bastaý alyp, Reseı arqyly (Máskeý, 2018 jyldyń sáýir-mamyry) ótken bolatyn.
Osy jyly Qytaıdyń Sıan qalasyndaǵy mýzeıden keıin «Altyn adam» Ázerbaıjan Respýblıkasynyń (Baký) Ulttyq mýzeıinde, Gdansk Ulttyq mýzeıinde (Gdansk, Polsha) jáne Koreıanyń (Seýl) Ulttyq mýzeıinde kórsetiletin bolady. Al 2019 jyly joba arqyly Japonııa, Grýzııa, Ulybrıtanııa, Ispanııamen Túrkııa, 2020 jyly AQSh, Italııa, Avstrııa, Frantsııa men Germanııany basyp ótý kózdelgen.