Qytaıdyń Shyńjańynda lańkestik jasaýǵa aıyptalǵan taǵy on úsh adamǵa ólim jazasy kesildi
BEIJІŃ. QazAqparat - Shyńjańdaǵy lańkestikti jasaýǵa aıyptalǵan on úsh adam dúısenbi kúni eń joǵary jazaǵa kesildi. Mundaı sheshimdi QHR ShUAÓ-niń jergilikti sottary shyǵardy.
7 qylmystyq is materıaldary boıynsha aıyptalǵan on úsh adam lańkestik toptardy uıymdastyrǵany jáne oǵan basshylyq etkeni, qatysqany, sondaı-aq qasaqana adam óltirý, órt qoıý, jarylǵysh zattardy daıyndaý, saqtaý jáne tasymaldaý qylmystary úshin ólim jazasyna kesildi.
Olardyń ishinde úsh adam 2013 jyly maýsymda ShUAÓ ákimshilik ortalyǵy - Úrimji mańynda ornalasqan Turfan okrýginde lańkestik áreket uıymdastyrǵany úshin eń joǵary jazaǵa tartyldy. Osy shabýyl kezinde 24 adam qazaǵa ushyrap, 23-i jaralanǵan bolatyn.
Eske sala keteıik, sol kezde adamdardyń belgisiz toby polıtseı ýchaskesine, qarýly polıtsııa arnaıy bólimshesine, jergilikti ákimshylyq ǵımaratyna jáne mıgrant jumysshylardyń qurylys alańyna shabýyl jasaǵan bolatyn. Shabýyl barysynda polıtseılerdiń mashınasy órteldi. Polıtsııa qyzmetkerleriniń qarý qoldanýy nátıjesinde on bir shapqynshy óltirildi, tórteýi qolǵa tústi.
