Qytaıdyń shyǵysynda nóser jaýynnan 2 mln adam japa shekti

BEIJІŃ. QazAqparat - Qytaıdyń shyǵysyndaǵy Tszıansı provıntsııasynda nóser jaýynnan 2 mln adam japa shekti, dep habarlaıdy QazAqparat tilshisi «Sınhýa» agenttigine silteme jasap.

Tszıansı provıntsııasynda tabıǵat tosyn minez tanytyp, nóser jańbyr jaýǵan. Bul 2,05 mln turǵynnyń qalypty ómir daǵdysyn buzdy. 150 myń gektar egistik sý astynda qaldy. Ekonomıkalyq shyǵyn 6,79 mlrd ıýannen ($1,01 mlrd) asyp jyǵylǵan.

Qyzyl sý basqan aımaqtan shuǵyl túrde 300 myń turǵyn evakýatsııalandy.

Jergilikti BAQ-tyń habarlaýynsha, bılik alǵash ret Tszıansı provıntsııasynda aýa raıynyń qolaısyzdyǵyna baılanysty qyzyl deńgeıdegi tótenshe jaǵdaı jarııalaǵan.
Aıta ketý kerek, Qytaıda tótenshe jaǵdaı 4 deńgeı boıynsha belgilenedi: kók, sary, qyzyl sary jáne qyzyl deńgeı.