Qytaıdyń ońtústigindegi sel tasqyny qurbandarynyń sany 50 adamǵa jetti
ASTANA. Qyrkúıektiń 23-i. QazAqparat - Qytaıdyń Gýandýn provıntsııasynda bolǵan sońǵy 200 jyldaǵy eń qatty nóser eń az degende 50 adamnyń ólimine ákelip soqty, dep habarlady "Chjýngo sınven" agenttigi.
«Fanapı» taıfýny Qytaıdyń ońtústigine alyp kelgen nóser jaýyn Gýandýnda dúısenbiden beri tolastaǵan joq. Buǵan deıingi aqparattarda 33 adamnyń qaza bolǵany, taǵy 42 adamnyń iz-túzsiz joǵalǵany aıtylǵan bolatyn. Al sońǵy málimetter boıynsha, apat qurbandarynyń sany 50 adamǵa jetken, taǵy 30 adamnyń taǵdyry belgisiz.
Tabıǵattyń tosyn minezinen aımaqta 1 mıllıonnan astam adam zardap shegip otyr. Tolyq emes málimetter boynsha, nóser sebep bolǵan laı kóshkinderi 1,5 myńdaı úıdi shaıyp áketken. Tikeleı ekonomıkalyq shyǵyn 2 mıllıard ıýanǵa (298,5 mıllıon dollar) baǵalanǵan. Laı kóshý qaýpine baılanysty 80 myńdaı adam qaýipsiz jerlerge kóshirilgen.
